ਜਲੰਧਰ: ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ.ਐਮ.ਪੀ.ਆਈ.) ਦੇ ਜਨਰਲ ਸਕੱਤਰ ਕਾਮਰੇਡ ਮੰਗਤ ਰਾਮ ਪਾਸਲਾ ਨੇ ਪਾਰਟੀ ਦੀ ਕੇਂਦਰੀ ਕਮੇਟੀ ਵਲੋਂ ਨਿਮਨ ਲਿਖਤ ਬਿਆਨ ਜਾਰੀ ਕੀਤਾ ਹੈ।
“ਲੰਘੀ 22 ਅਪ੍ਰੈਲ ਨੂੰ ਪਹਿਲਗਾਮ ਵਿਖੇ ਵਾਪਰੀ ਦੁਖਦਾਈ ਘਟਨਾ, ਜਿਸ ’ਚ ਆਤੰਕਵਾਦੀਆਂ ਨੇ ਦੇਸ਼ ਦੇ ਵੱਖੋ-ਵੱਖ ਪ੍ਰਾਂਤਾਂ ’ਚੋਂ ਆਏ 26 ਬੇਗੁਨਾਹ ਸੈਲਾਨੀਆਂ ਅਤੇ ਸੈਲਾਨੀਆਂ ਦੀ ਰਾਖੀ ਲਈ ਨਿੱਤਰੇ ਇਕ ਕਸ਼ਮੀਰੀ ਜਾਂਬਾਜ਼ ਦੀ ਗੋਲੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਸੀ, ਦੇ ਜਵਾਬ ’ਚ ਭਾਰਤੀ ਸੈਨਾ ਨੇ ਦੇਸ਼ ਦੀ ਕੇਂਦਰੀ ਸਰਕਾਰ ਦੇ ਹੁਕਮਾਂ ਤਹਿਤ ਜਵਾਬੀ ਕਾਰਵਾਈ ਕੀਤੀ ਹੈ। ਇਸ ਬਾਰੇ ਜਾਰੀ ਸਰਕਾਰੀ ਬਿਆਨ ਰਾਹੀਂ ਦੱਸਿਆ ਗਿਆ ਹੈ ਕਿ ਭਾਰਤੀ ਫੌਜਾਂ ਨੇ ਸਾਂਝੀ ਕਾਰਵਾਈ ਕਰਦਿਆਂ ‘ਸੁਨਿਸ਼ਚਿਤ ਤੇ ਸੀਮਤ ਨਿਸ਼ਾਨਿਆਂ’ ਤੇ ਹਮਲੇ ਕਰਕੇ ਪਾਕਿਸਤਾਨ ਵਿਚਲੇ ਅੱਤਵਾਦੀਆਂ ਦੇ 9 ਟਿਕਾਣੇ ਤਬਾਹ ਕਰ ਦਿੱਤੇ ਹਨ। ਇਨ੍ਹਾਂ ਹਮਲਿਆਂ ’ਚ 80 ਅੱਤਵਾਦੀ ਮਾਰੇ ਜਾਣ ਦਾ ਦਾਅਵਾ ਕੀਤਾ ਗਿਆ ਹੈ। ਇਸ ਅਪ੍ਰੇਸ਼ਨ ਦੌਰਾਨ ਪਾਕਿਸਤਾਨ ਦੇ ਕਿਸੇ ਵੀ ਫੌਜੀ ਟਿਕਾਣੇ ਨੂੰ ਨਿਸ਼ਾਨਾ ਨਹੀਂ ਬਣਾਇਆ ਗਿਆ।’’ ਇੱਥੇ ਇਹ ਗੱਲ ਨੋਟ ਕਰਨ ਵਾਲੀ ਹੈ ਕਿ ਪਾਕਿ ’ਚ ਚਲ ਰਹੇ ਦਹਿਸ਼ਤਗਰਦਾਂ ਦੇ ਕੈਂਪ ਪਾਕਿਸਤਾਨ ਦੀ ਆਈ.ਐਸ.ਆਈ. ਤੇ ਅਮਰੀਕਾ ਦੀ ਖੁਫ਼ੀਆ ਏਜੰਸੀ ਸੀ.ਆਈ.ਏ. ਦੀ ਪੂਰਨ ਸਹਾਇਤਾ ਨਾਲ ਚੱਲ ਰਹੇ ਹਨ।
ਕੇਂਦਰੀ ਕਮੇਟੀ ਦੀ ਰਾਇ ਹੈ ਕਿ ਇਸ ਕਾਰਵਾਈ ਨਾਲ ਉਨ੍ਹਾਂ ਭਾਰਤੀ ਪਰਿਵਾਰਾਂ ਨੂੰ ਕੁਝ ਮਾਨਸਿਕ ਰਾਹਤ ਜ਼ਰੂਰ ਮਿਲੀ ਹੋਵੇਗੀ, ਜਿਨ੍ਹਾਂ ਨੇ ਆਪਣਿਆਂ ਨੂੰ ਦਹਿਸ਼ਤਗਰਦਾਂ ਦੀਆਂ ਗੋਲੀਆਂ ਨਾਲ ਮਰਦੇ ਦੇਖਿਆ ਹੈ। ਭਾਰਤ ਦੇ ਆਮ ਲੋਕਾਂ, ਜਿਹੜੇ ਹਰ ਕਿਸਮ ਦੇ ਆਤੰਕਵਾਦ ਤੇ ਫਿਰਕੂ ਨਫ਼ਰਤੀ ਪ੍ਰਚਾਰ ਦੇ ਸਖ਼ਤ ਵਿਰੋਧੀ ਹਨ, ਨੂੰ ਵੀ ਇਸ ਨਾਲ ਕੁੱਝ ਤਸੱਲੀ ਜ਼ਰੂਰ ਮਿਲੀ ਹੋਵੇਗੀ। ਇਸ ਕਾਰਵਾਈ ਨਾਲ ਆਤੰਕਵਾਦੀ ਜਰਵਾਣਿਆਂ ਤੇ ਉਨ੍ਹਾਂ ਦੇ ਪਾਕਿਸਤਾਨ ਵਿਚਲੇ ਆਕਾਵਾਂ ਨੂੰ ਵੀ ਢੁਕਵਾਂ ਸਬਕ ਮਿਲਿਆ ਹੋਵੇਗਾ ਤਾਂ ਜੋ ਉਹ ਭਵਿੱਖ ’ਚ ਪਹਿਲਗਾਮ ਵਰਗੀ ਹੋਰ ਕਿਸੇ ਦਹਿਸ਼ਤਗਰਦੀ ਦੀ ਘਟਨਾ ਨੂੰ ਅੰਜ਼ਾਮ ਦੇਣ ਤੋਂ ਤੌਬਾ ਕਰਨ।
ਬਿਆਨ ਰਾਹੀਂ ਅੱਗੇ ਕਿਹਾ ਗਿਆ ਹੈ ਕਿ ਇਸ ਖਿੱਤੇ ਦੇ ਲੋਕਾਂ ਤੇ ਸਮੁੱਚੇ ਸੰਸਾਰ ਲਈ ਇਹ ਡੂੰਘੀ ਚਿੰਤਾ ਦਾ ਵਿਸ਼ਾ ਹੈ ਕਿ ਪਹਿਲਗਾਮ ਦੀ ਹੌਲਨਾਕ ਵਾਰਦਾਤ ਅਤੇ ਭਾਰਤੀ ਫੌਜੀ ਦੀ ਜਵਾਬੀ ਕਾਰਵਾਈ ਤੋਂ ਪਿਛੋਂ ਭਾਰਤ-ਪਾਕਿਸਤਾਨ ਦਰਮਿਆਨ ਖੁੱਲ੍ਹੀ ਜੰਗ ਛਿੜਣ ਦਾ ਖਤਰਾ ਖੜ੍ਹਾ ਹੋ ਗਿਆ ਹੈ। ਪਹਿਲਗਾਮ ਦੀ ਵਾਰਦਾਤ ਕਰਨ ਪਿੱਛੇ ਅਸਲ ’ਚ ਆਤੰਕਵਾਦੀਆਂ ਦੀ ਇੱਛਾ ਵੀ ਇਹੋ ਸੀ। ਉਹ ਚਾਹੁੰਦੇ ਸਨ ਕਿ ਇਸ ਸਮੂਹਿਕ ਕਤਲੇਆਮ ਦੇ ਪ੍ਰਤੀਕ੍ਰਮ ਵਜੋਂ ਭਾਰਤ ਅੰਦਰ ਹਿੰਦੂ-ਮੁਸਲਮਾਨ ਫਿਰਕਿਆਂ ਵਿਚਕਾਰ ਫਿਰਕੂ ਵੰਡ ਹੋਰ ਤਿੱਖੀ ਹੋ ਜਾਵੇ ਤਾਂ ਜੋ ਇਸ ਖਿੱਤੇ ਅੰਦਰ ਜੰਗ ਦੇ ਲਾਂਬੂੰ ਲਗਾਉਣੇ ਆਸਾਨ ਹੋ ਜਾਣ। ਬੇਸ਼ਕ ਇਸ ਗੱਲੋਂ ਤਾਂ ਤਸੱਲੀ ਹੈ ਕਿ ਭਾਰਤ ਦੇ ਭਾਰੀ ਬਹੁ ਗਿਣਤੀ ਲੋਕਾਂ, ਸਮੂਹ ਰਾਜਸੀ ਧਿਰਾਂ ਤੇ ਨਾਗਰਿਕ ਸਮਾਜ ਨੇ ਦਹਿਸ਼ਤਗਰਦਾਂ ਦੀ ਇਸ ਬੁਜ਼ਦਿਲਾਨਾ ਕਾਰਵਾਈ ਦਾ ਡਟਵਾਂ ਵਿਰੋਧ ਕਰਦਿਆਂ ਇੱਕਮੁੱਠਤਾ ਦਾ ਸਬੂਤ ਦਿੱਤਾ ਹੈ। ਪ੍ਰੰਤੂ ਭਾਰਤ ਵਿਚਲੇ ਗੈਰ ਜ਼ਿੰਮੇਵਾਰ ਤੇ ਭੜਕਾਊ ਸੱਜੇ ਪੱਖੀ ਤੱਤਾਂ ਨੇ, ਇਸ ਵਾਰਦਾਤ ਤੋਂ ਪਿਛੋਂ ਜਿਵੇਂ ਸਮੁੱਚੇ ਮੁਸਲਮਾਨ ਭਾਈਚਾਰੇ ਵਿਰੁੱਧ ਜ਼ਹਿਰ ਉਗਲਿਆ ਹੈ, ਉਸ ਨੇ ਆਤੰਕਵਾਦੀਆਂ ਦੇ ਕੋਝੇ ਮਨਸੂਬਿਆਂ ਨੂੰ ਹੀ ਅੱਗੇ ਤੋਰਨ ਦਾ ਕੰਮ ਕੀਤਾ ਹੈ।
ਆਪਣੇ ਪਤੀ ਨੂੰ ਸ਼ਹੀਦ ਹੁੰਦਿਆਂ ਦੇਖਣ ਵਾਲੀ, ਮਾਨਵੀ ਸੋਚ ਦੀ ਧਾਰਨੀ, ਮਾਣਮੱਤੀ ਬੇਟੀ ਹਿਮਾਂਸ਼ੀ ਨਰਵਾਲ ਨੇ ਜਿੱਥੇ ਆਪਣੇ ਪਤੀ ਦੇ ਕਾਤਲਾਂ ਨੂੰ ਸਖਤ ਸਜ਼ਾਵਾਂ ਦੇਣ ਦੀ ਮੰਗ ਕੀਤੀ ਸੀ, ਉੱਥੇ ਨਾਲ ਹੀ ਉਸਨੇ ਮੁਸਲਮਾਨਾਂ ਤੇ ਕਸ਼ਮੀਰੀਆਂ ਵਿਰੁੱਧ ਜ਼ਹਿਰੀਲਾ ਪ੍ਰਚਾਰ ਬੰਦ ਕਰਨ ਤੇ ਅਮਨ ਕਾਇਮ ਰੱਖਣ ਤੇ ਦੀ ਵੀ ਅਪੀਲ ਕੀਤੀ ਸੀ। ਇਸ ਤੋਂ ਬੁਖਲਾ ਕੇ ਜਿਸ ਤਰ੍ਹਾਂ ਦੇ ਗੰਦੇ ਤੇ ਅਖਲਾਕ ਤੋਂ ਕੋਰੇ ਸ਼ਬਦਾਂ ਨਾਲ ਹਿਮਾਂਸ਼ੀ ਵਿਰੁੱਧ ਅਪੱਤੀਜਨਕ ਪ੍ਰਚਾਰ ਕੀਤਾ ਗਿਆ, ਉਹ ਡਾਢਾ ਸ਼ਰਮਨਾਕ ਤੇ ਨਿੰਦਣਯੋਗ ਹੈ।
ਸਾਥੀ ਪਾਸਲਾ ਨੇ, ਦੋਨਾਂ ਦੇਸ਼ਾਂ ਦਰਮਿਆਨ ਮਤਭੇਦਾਂ ਤੇ ਅੱਤਵਾਦ ਨਾਲ ਜੁੜੇ ਮੁੱਦਿਆਂ ਨੂੰ ਡਿਪਲੋਮੈਟਿਕ ਢੰਗ ਨਾਲ ਮਿਲ-ਬੈਠ ਕੇ ਸੁਲਝਾਉਣ ਦੀ ਅਪੀਲ ਕਰਦਿਆਂ ਦੋਨੋਂ ਗੁਆਂਢੀ ਦੇਸ਼ਾਂ ਦਰਮਿਆਨ ਫੌਜੀ ਟਕਰਾਅ ਜਾਂ ਹਮਲਾ ਹਰ ਕੀਮਤ ’ਤੇ ਟਾਲਣ ਦੀ ਲੋੜ ’ਤੇ ਜ਼ੋਰ ਦਿੱਤਾ ਹੈ। ਕਿਉਂਕਿ ਜੰਗ ਕਿਸੇ ਮਸਲੇ ਦਾ ਹੱਲ ਨਹੀਂ, ਬਲਕਿ ਹੋਰ ਨਵੇਂ ਮਸਲਿਆਂ ਨੂੰ ਜਨਮ ਦਿੰਦੀ ਹੈ।
ਸਾਥੀ ਪਾਸਲਾ ਨੇ ਭਾਰਤ ਦੇ ਲੋਕਾਂ ਨੂੰ ਵੀ ਅਪੀਲ ਕੀਤੀ ਹੈ ਕਿ ਉਹ ਹਰ ਰੰਗ ਦੇ ਆਤੰਕਵਾਦੀਆਂ ਤੇ ਨਫਰਤੀ, ਭੜਕਾਊ ਭਾਸ਼ਣ ਦੇਣ ਵਾਲੇ ਫਿਰਕੂ ਤੱਤਾਂ ਤੋਂ ਸਾਵਧਾਨ ਰਹਿ ਕੇ ‘ਜੰਗ ਨਹੀਂ-ਅਮਨ ਚਾਹੀਦਾ ਹੈ’’ ਦੇ ਸੁਨੇਹੇ ਨੂੰ ਭਾਰਤੀ ਫਿਜ਼ਾ ’ਚ ਬਿਖੇਰਨ ਲਈ ਅੱਗੇ ਆਉਣ।
ਆਰ.ਐਮ.ਪੀ.ਆਈ., ਮੋਦੀ ਸਰਕਾਰ ਨੂੰ ਵੀ ਸੁਚੇਤ ਕਰਨਾ ਚਾਹੁੰਦੀ ਹੈ ਕਿ ਉਹ ਮੌਜੂਦਾ ਮਹੌਲ ਦਾ ਲਾਹਾ ਲੈ ਕੇ ਲੋਕਾਂ ਦੀ ਲਿਖਣ-ਬੋਲਣ ਦੀ ਆਜ਼ਾਦੀ ’ਤੇ ਪਾਬੰਦੀਆਂ ਲਾਉਣ ਦਾ ਸਿਲਸਿਲਾ ਬੰਦ ਕਰੇ। ਵੱਖੋ-ਵੱਖ ਧਰਮਾਂ, ਜਾਤੀਆਂ ਨਾਲ ਸਬੰਧਤ ਦੇਸ਼ ਵਾਸੀਆਂ ਅਤੇ ਦੇਸ਼ ਹਿਤਾਂ ਲਈ ਕੰਮ ਕਰਨ ਵਾਲੇ ਪੱਤਰਕਾਰਾਂ ਤੇ ਬੁੱਧੀਜੀਵੀਆਂ ਉਪਰ ਸਰਕਾਰ ਤੇ ਸਵਾਰਥੀ ਤੱਤਾਂ ਵੱਲੋਂ ਕੀਤੇ ਜਾ ਹਮਲਿਆਂ ’ਚੋਂ ਦੇਸ਼ ਭਗਤੀ ਦੀ ਨਹੀਂ, ਬਲਕਿ ਤਾਨਾਸ਼ਾਹੀ ਰੁਝਾਨਾਂ ਅਤੇ ਦੇਸ਼ ਨੂੰ ਫਿਰਕੂ ਲੀਹਾਂ ’ਤੇ ਵੰਡ ਕੇ ਕਮਜ਼ੋਰ ਕਰਨ ਦੀ ਸਾਜ਼ਿਸ਼ ਦੀ ਬੂ ਆਉਂਦੀ ਹੈ।
