ਜਲੰਧਰ: ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰਐੱਮਪੀਆਈ) ਦੀ ਕੇਂਦਰੀ ਕਮੇਟੀ ਦੇ ਚੇਅਰਮੈਨ ਕਾਮਰੇਡ ਕੇ. ਗੰਗਾਧਰਨ ਅਤੇ ਜਨਰਲ ਸਕੱਤਰ ਕਾਮਰੇਡ ਮੰਗਤ ਰਾਮ ਪਾਸਲਾ ਨੇ ਅੱਜ ਇੱਥੋਂ ਜਾਰੀ ਇਕ ਸਾਂਝੇ ਬਿਆਨ ਰਾਹੀਂ ਅਮਰੀਕਾ ਵਲੋਂ ਈਰਾਨ 'ਤੇ ਕੀਤੇ ਗਏ ਭਿਆਨਕ ਜੰਗੀ ਹਮਲੇ ਦੀ ਕਰੜੀ ਨਿਖੇਧੀ ਕਰਦਿਆਂ ਕਿਹਾ ਹੈ ਕਿ ਅਮਰੀਕਾ ਨੇ ਆਪਣੀ ਇਸ ਅਨੈਤਿਕ ਤੇ ਭੜਕਾਊ ਕਾਰਵਾਈ ਨਾਲ ਨਾ ਕੇਵਲ ਸਮੁੱਚੇ ਏਸ਼ੀਆਈ ਮਹਾਂਦੀਪ ਨੂੰ ਜੰਗ ਦੀ ਭੱਠੀ 'ਚ ਝੋਕ ਦਿੱਤਾ ਹੈ, ਬਲਕਿ ਉਹ ਦਾ ਇਹ ਦਹਿਸ਼ਤੀ ਕਾਰਾ ਸੰਸਾਰ ਅਮਨ ਲਈ ਵੀ ਗੰਭੀਰ ਖਤਰੇ ਖੜ੍ਹੇ ਕਰਨ ਦਾ ਸਬਬ ਬਣੇਗਾ।
ਗੰਗਾਧਰਨ ਅਤੇ ਪਾਸਲਾ ਨੇ ਕਿਹਾ ਹੈ ਕਿ ਸਾਰਾ ਸੰਸਾਰ ਇਹ ਜਾਣਦਾ ਹੈ ਕਿ ਇਜ਼ਰਾਇਲ, ਜਿਸ ਦੀ ਹਿਮਾਇਤ 'ਚ ਅਮਰੀਕਾ ਈਰਾਨ ਖਿਲਾਫ਼ ਨਿੱਤਰਿਆ ਹੈ, ਪ੍ਰਮਾਣੂ ਬੰਬ ਬਣਾ ਚੁਕਾ ਹੈ। ਇਹੋ ਨਹੀਂ ਇਜ਼ਰਾਇਲ, ਸੰਸਾਰ ਭਰ ਦੇ ਅਮਨ ਦੇ ਚਾਹਵਾਨ ਲੋਕਾਂ ਅਤੇ ਯੂਐੱਨਓ ਸਮੇਤ ਸਾਰੇ ਕੌਮਾਂਤਰੀ ਅਦਾਰਿਆਂ ਨੂੰ ਠੁੱਠ ਦਿਖਾ ਕੇ ਨਾ ਕੇਵਲ ਫਲਸਤੀਨੀਆਂ ਦਾ ਨਸਲਘਾਤ ਤੇ ਉਜਾੜ ਜਾਰੀ ਰੱਖ ਰਿਹਾ ਹੈ ਬਲਕਿ ਇਸ ਨੇ ਮੱਧ ਪੂਰਬ ਦੇ ਸਾਰੇ ਦੇਸ਼ ਜੰਗ ਦੀ ਭੱਠੀ ਵਿਚ ਝੋਕ ਦਿੱਤੇ ਹਨ। ਇਸ ਦੇ ਉਲਟ ਅਮਰੀਕਾ ਦਾ ਖੁਫੀਆ ਵਿਭਾਗ ਦੀ ਪ੍ਰਮੁੱਖ ਤੁਲਸੀ ਗਾਬਾਰਡ ਇਸੇ ਸਾਲ ਘੱਟੋ-ਘੱਟ ਤਿੰਨ ਵਾਰ ਕਹਿ ਚੁੱਕੀ ਹੈ ਕਿ ਈਰਾਨ ਨੇ ਨਾ ਪਰਮਾਣੂ ਬੰਬ ਬਣਾਇਆ ਹੈ ਤੇ ਨਾ ਹੀ ਇਹ ਬਣਾਉਣ ਦੇ ਕਾਬਲ ਹੈ।
ਆਈਏਈਏ (ਕੌਮਾਂਤਰੀ ਪ੍ਰਮਾਣੂ ਊਰਜਾ ਏਜੰਸੀ) ਦਾ ਡਾਇਰੈਕਟਰ ਜਨਰਲ ਰਫਾਇਲ ਗ੍ਰੇਸੀ ਵੀ ਦੋ ਦਿਨ ਪਹਿਲਾਂ ਕਹਿ ਚੁੱਕਾ ਹੈ ਕਿ ਈਰਾਨ ਕੋਈ ਪ੍ਰਮਾਣੂ ਬੰਬ ਨਹੀਂ ਬਣਾ ਰਿਹਾ ਬਲਕਿ ਪ੍ਰਮਾਣੂ ਬਿਜਲੀ ਪੈਦਾਵਾਰ ਦੇ ਆਪਣੇ ਸਾਰੇ ਅਦਾਰਿਆਂ ਦੀ ਜਾਂਚ-ਪੜਤਾਲ 'ਚ ਹਰ ਪੱਖੋਂ ਸਹਿਯੋਗ ਦੇ ਰਿਹਾ ਹੈ।
ਈਰਾਨ, 'ਪ੍ਰਮਾਣੂ ਪ੍ਰਸਾਰ ਰੋਕਣ ਵਾਲੀ ਕੌਮਾਂਤਰੀ ਸੰਧੀ'(ਐਨਪੀਟੀ) 'ਤੇ ਵੀ ਦਸਤਖ਼ਤ ਕਰ ਚੁਕਾ ਹੈ ਅਤੇ ਯੂਐੱਨਓ ਦੇ ਪੰਜ ਸਥਾਈ ਮੈਂਬਰਾਂ ਰੂਸ, ਚੀਨ, ਫਰਾਂਸ, ਬ੍ਰਿਟੇਨ, ਅਮਰੀਕਾ ਨਾਲ ਹੋਏ ਸਮਝੌਤੇ 'ਜੇਸੀਪੀਓਏ' 'ਚ ਕਦੀ ਵੀ ਪ੍ਰਮਾਣੂ ਬੰਬ ਨਾ ਬਣਾਉਣ ਦੀ ਗਰੰਟੀ ਦੇ ਚੁੱਕਾ ਹੈ।
ਸਾਥੀ ਪਾਸਲਾ ਅਤੇ ਗੰਗਾਧਰਨ ਨੇ ਭਾਰਤ ਸਰਕਾਰ ਤੋਂ ਅਮਰੀਕਾ ਦੀ ਇਸ ਦਾਦਾਗਿਰੀ ਖਿਲਾਫ ਡੱਟਵਾਂ ਅਸੂਲੀ ਸਟੈਂਡ ਲੈਣ ਦੀ ਮੰਗ ਕਰਦਿਆਂ ਦੇਸ਼ ਵਾਸੀਆਂ ਨੂੰ ਜੰਗਬਾਜ਼ ਜੁੰਡਲੀ ਖਿਲਾਫ ਸ਼ਕਤੀਸ਼ਾਲੀ ਅਮਨ ਲਹਿਰ ਖੜ੍ਹੀ ਕਰਨ ਦੀ ਅਪੀਲ ਕੀਤੀ ਹੈ।
ਉਨ੍ਹਾਂ ਪਾਰਟੀ ਇਕਾਈਆਂ ਨੂੰ ਜੰਗ ਵਿਰੋਧੀ ਐਕਸ਼ਨ ਜਥੇਬੰਦ ਕਰਨ ਅਤੇ ਟਰੰਪ ਤੇ ਨੇਤਨਯਾਹੂ ਦੇ ਪੁਤਲੇ ਸਾੜੇ ਜਾਣ ਦਾ ਸੱਦਾ ਦਿੱਤਾ ਹੈ।
No comments:
Post a Comment