ਵਸਤੂ ਅਤੇ ਸੇਵਾ ਟੈਕਸ (G.S.T.) ਖਿਲਾਫ 3 ਤੋਂ 10 ਜੁਲਾਈ ਤੱਕ ਪੁਤਲੇ ਸਾੜਨ ਦਾ ਸੱਦਾ

ਜਲੰਧਰ, 3 ਜੁਲਾਈ  - ''ਵਸਤੂ ਅਤੇ ਸੇਵਾ ਟੈਕਸ (G.S.T.) ਨੂੰ ਦੇਸ਼ ਪੱਧਰ ਉਪਰ ਲਾਗੂ ਕਰਕੇ ਨਰਿੰਦਰ ਮੋਦੀ ਦੀ ਸਰਕਾਰ ਨੇ ਇਕ ਵਾਰ ਫੇਰ ਸਿੱਧ ਕਰ ਦਿੱਤਾ ਹੈ ਕਿ ਉਹ ਦੇਸੀ ਤੇ ਵਿਦੇਸ਼ੀ ਕਾਰਪੋਰੇਟ ਘਰਾਣਿਆਂ ਦੇ ਮੁਨਾਫ਼ੇ ਵਧਾਉਣ ਹਿੱਤ ਦੇਸ਼ ਦੇ ਕਿਰਤੀ ਵਰਗ, ਮਜ਼ਦੂਰਾਂ, ਕਿਸਾਨਾਂ, ਦਰਮਿਆਨੇ ਵਰਗ ਦੇ ਲੋਕਾਂ, ਛੋਟੀ ਤੇ ਦਰਮਿਆਨੇ ਦਰਜੇ ਦੇ ਕਾਰੋਬਾਰੀਆਂ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰਨ ਉਪਰ ਤੁਲੀ ਹੋਈ ਹੈ। ਇਹ ਅਸਿੱਧਾ ਟੈਕਸ ਆਮ ਲੋਕਾਂ 'ਤੇ ਆਰਥਿਕ ਭਾਰ ਲੱਦਣ ਦਾ ਇਕ ਅਜਮਾਇਆ ਹੋਇਆ ਲੋਕ ਮਾਰੂ ਢੰਗ ਹੈ, ਜੋ ਮਹਿੰਗਾਈ, ਬੇਕਾਰੀ ਦੇ ਵਾਧੇ ਦੇ ਨਾਲ ਨਾਲ ਛੋਟੇ ਤੇ ਦਰਮਿਆਨੇ ਦਰਜੇ ਦੇ ਵਿਉਪਾਰੀਆਂ ਤੇ ਕਾਰੋਬਾਰੀਆਂ ਨੂੰ ਖਤਮ ਕਰਕੇ ਵੱਡੇ ਧਨੀਆਂ ਤੇ ਵਿਦੇਸ਼ੀ ਕੰਪਨੀਆਂ ਨੂੰ ਮਾਲਾ ਮਾਲ ਕਰ ਦੇਵੇਗਾ। ਇਸ ਨਾਲ ਕਿਰਤੀ ਲੋਕ ਹੋਰ ਗਰੀਬੀ ਅਤੇ ਭੁਖਮਰੀ ਵੱਲ ਧੱਕੇ ਜਾਣਗੇ।'' ਇਹ ਸ਼ਬਦ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (RMPI) ਦੇ ਜਨਰਲ ਸਕੱਤਰ ਸਾਥੀ ਮੰਗਤ ਰਾਮ ਪਾਸਲਾ ਨੇ ਇਕ ਬਿਆਨ ਵਿਚ ਆਖੇ। ਸਾਥੀ ਪਾਸਲਾ ਨੇ ਅੱਗੇ ਕਿਹਾ ਹੈ ਕਿ ਉਦਾਹਰਣ ਵਜੋਂ ਚਾਹ, ਖੰਡ, ਖਾਣ ਵਾਲੇ ਤੇਲਾਂ ਵਿਚ 5%, ਘਿਓ 'ਚ 12%, ਸਾਬਣ ਤੇ ਵਾਲਾਂ ਦੇ ਤੇਲ 'ਚ 18% ਅਤੇ ਟੂਥਪੇਸਟ ਅਤੇ ਪਲਾਸਟਿਕ ਦਾ ਸਮਾਨ ਬਣਾਉਣ ਵਿਚ 28% ਜੀ.ਐਸ.ਟੀ. ਲਾਗੂ ਹੋਣ ਨਾਲ ਇਨ੍ਹਾਂ ਵਸਤਾਂ ਦੀਆਂ ਕੀਮਤਾਂ ਵਿਚ ਵੱਡਾ ਵਾਧਾ ਹੋਵੇਗਾ। ਜੀ.ਐਸ.ਟੀ. ਵਿਚ 28% ਸਮੁੱਚਾ ਵਾਧਾ ਸਾਰੇ ਸੰਸਾਰ ਤੋਂ ਹੀ ਵਧੇਰੇ ਹੈ, ਜਿਸ ਨਾਲ ਰਾਜਾਂ ਦੇ ਵਿੱਤੀ ਅਧਿਕਾਰਾਂ ਉਪਰ ਵੱਡਾ ਛਾਪਾ ਵੱਜੇਗਾ। ਸਿੱਟੇ ਵਜੋਂ ਸਮਾਜਿਕ ਸੁਰੱਖਿਆ 'ਤੇ ਹੁੰਦੇ ਖਰਚ ਵਿਚ ਕਟੌਤੀ ਹੋਵੇਗੀ ਅਤੇ ਸਬ ਸਿਡੀਆਂ ਘਟਣਗੀਆਂ। ਉਂਝ ਵੀ ਹਰ ਅਸਿੱਧਾ ਟੈਕਸ ਅੰਤਮ ਰੂਪ ਵਿਚ ਖਪਤਕਾਰ ਦੇ ਸਿਰ ਉਪਰ ਹੀ ਭਾਰ ਪਾਉਂਦਾ ਹੈ।
ਸਾਥੀ ਪਾਸਲਾ ਨੇ ਇਸ ਗੱਲ ਉਪਰ ਤਸੱਲੀ ਦਾ ਪ੍ਰਗਟਾਵਾ ਕੀਤਾ ਕਿ ਜਦੋਂ ਮੋਦੀ ਸਰਕਾਰ 30 ਜੂਨ ਦੀ ਰਾਤ ਨੂੰ ''ਦੂਸਰੀ ਆਜ਼ਾਦੀ'' ਦਾ ਨਾਂਮ ਦੇ ਕੇ (ਅਸਲ ਵਿਚ ਕਮਰ ਤੋੜਵੀਂ ਗੁਲਾਮੀ) ਇਸ ਟੈਕਸ ਪ੍ਰਣਾਲੀ ਦੇ ਜਸ਼ਨ ਮਨਾ ਰਹੀ ਸੀ, ਤਾਂ ਦੇਸ਼ ਭਰ ਦੇ ਕਿਰਤੀ, ਕਿਸਾਨ, ਵਿਉਪਾਰੀ, ਛੋਟੇ ਸਨਅਤਕਾਰ ਅਤੇ ਇੱਥੋਂ ਤੱਕ ਕਿ ਚਾਰਟਰਡ ਅਕਾਊਂਟੈਂਟਸ ਵੀ ਸੜਕਾਂ ਉਪਰ ਨਿਕਲ ਕੇ ਇਸ ਲੋਕ ਮਾਰੂ ਟੈਕਸ ਪ੍ਰਣਾਲੀ ਦਾ ਵਿਰੋਧ ਕਰ ਰਹੇ ਸਨ। ਆਰ.ਐਮ.ਪੀ.ਆਈ. ਇਨ੍ਹਾਂ ਸੰਘਰਸ਼ਸ਼ੀਲ ਲੋਕਾਂ ਸੰਗ ਮੋਢੇ ਨਾਲ ਮੋਢਾ ਜੋੜ ਕੇ ਘੋਲਾਂ ਵਿਚ ਹਿੱਸਾ ਲਵੇਗੀ।
ਆਰ.ਐਮ.ਪੀ.ਆਈ. ਨੇ 3 ਜੁਲਾਈ ਤੋਂ 10 ਜੁਲਾਈ ਤੱਕ ਪੰਜਾਬ ਦੇ ਪਿੰਡਾਂ, ਕਸਬਿਆਂ ਤੇ ਸ਼ਹਿਰਾਂ ਵਿਚ ਵਿਸ਼ਾਲ ਜਨਤਕ ਲਾਮਬੰਦੀ ਕਰਨ ਦਾ ਫੈਸਲਾ ਕੀਤਾ ਹੈ, ਜਿਸ ਦੌਰਾਨ ਝੰਡਾ ਮਾਰਚਾਂ ਰਾਹੀਂ ਕੇਂਦਰ ਸਰਕਾਰ ਦਾ ਲੋਕ ਵਿਰੋਧੀ ਚਿਹਰਾ ਬੇਪਰਦ ਕਰਕੇ ਮੋਦੀ ਸਰਕਾਰ ਤੇ ਜੀ.ਐਸ.ਟੀ. ਦੇ ਪੁਤਲੇ ਸਾੜੇ ਜਾਣਗੇ। ਸਾਥੀ ਪਾਸਲਾ ਨੇ ਸਾਰੀਆਂ ਪਾਰਟੀਆਂ ਇਕਾਈਆਂ ਤੇ ਪੰਜਾਬ ਦੇ ਸਮੁੱਚੇ ਲੋਕਾਂ ਨੂੰ ਮੋਦੀ ਸਰਕਾਰ ਦੇ ਇਸ ਲੋਕ ਮਾਰੂ ਕਦਮ ਦਾ ਡਟਵਾਂ ਵਿਰੋਧ ਕਰਨ ਤੇ ਇਨ੍ਹਾਂ ਜਨਤਕ ਐਕਸ਼ਨਾਂ ਨੂੰ ਸਫਲ ਕਰਨ ਦੀ ਅਪੀਲ ਕੀਤੀ ਹੈ।

Revolutionary Marxist Party of India massive demonstratins were organised

Jalandhar; 23rd June - Upon  call of the State Commitee of Revolutionary Marxist Party of India (RMPI), massive demonstratins were organised today at Baba Bakala, Samana, Nakodar, Gurdaspur, Kapurthala, Nawan Shehar, Koom Kalan, Mansa, Abohar, Sri Mukatsar Sahib tehsil headquarters. Despite peak paddy season , the toiling masses of the state, participated in large numbers everywhere in these actions. The participation of women and youth was noteworthy. Started from June 19th, these protest actions were culminated today . The call of these demonstrations was given against countrywide rising atrocities against dalits on the basis of upper caste chauvinism, planned communal voilence against minorities, especially against Muslims by the goons backed by RSS and openly sheltered by Modi Govt.,  gender discrimination and physical asaults against women. The demand of fulfiling election promises made by BJP and Congress to win the elections of Parliament and Punjab Assembly was another feature of these protest actions. These impressive gatherings were addressed by Comrade Mangat Ram Pasla General Secratary RMPI, along with other prominent leaders.

Issued by  
(Ravi Kanwar)

ਆਰਐੱਮਪੀਆਈ ਵਲੋਂ ਰੋਹ ਭਰਪੂਰ ਮੁਜ਼ਹਾਰੇ

ਜਲੰਧਰ, 23 ਜੂਨ - ''ਬੀਤੇ ਕੱਲ੍ਹ ਪੰਜਾਬ ਵਿਧਾਨ ਸਭਾ 'ਚ ਮਚਿਆ ਘਮਾਸਾਨ ਜਿੱਥੇ ਅਤੀ ਨਿੰਦਣਯੋਗ ਹੈ, ਉਥੇ ਇਹ ਵੀ ਸਿੱਧ ਕਰਦਾ ਹੈ ਕਿ ਵਿਧਾਨਕਾਰਾਂ ਦੀਆਂ ਤਿੰਨ ਮੁੱਖ ਧਿਰਾਂ ਭਾਵ ਕਾਂਗਰਸ, ਅਕਾਲੀ-ਭਾਜਪਾ ਅਤੇ ਆਪ ਨਿੱਜੀ ਹਊਮੈਂ ਅਤੇ ਧੁਰ ਅੰਦਰ ਤੱਕ ਲੋਕ ਵਿਰੋਧੀ ਮਾਨਸਿਕਤਾ ਨਾਲ ਗ੍ਰਸੇ ਹੋਏ ਹਨ।'' ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ.ਐਮ.ਪੀ.ਆਈ.) ਦੇ ਜਨਰਲ ਸਕੱਤਰ ਸਾਥੀ ਮੰਗਤ ਰਾਮ ਪਾਸਲਾ ਤੇ ਹੋਰ ਕੇਂਦਰੀ ਅਤੇ ਸੂਬਾਈ ਆਗੂਆਂ ਨੇ ਪਾਰਟੀ ਵਲੋਂ ਜਥੇਬੰਦ ਕੀਤੇ ਗਏ ਤਹਿਸੀਲ ਪੱਧਰੀ ਮੁਜ਼ਾਹਰਿਆਂ ਤੋਂ ਪਹਿਲਾਂ ਹੋਈਆਂ ਪ੍ਰਭਾਵਸ਼ਾਲੀ ਇਕੱਤਰਤਾਵਾਂ ਨੂੰ ਸੰਬੋਧਨ ਕਰਦਿਆਂ ਕੀਤਾ। ਜਿਕਰਯੋਗ ਹੈ ਕਿ ਆਰ.ਐਮ.ਪੀ.ਆਈ. ਵਲੋਂ 19 ਜੂਨ ਤੋਂ ਸੂਬੇ ਦੇ ਤਹਿਸੀਲ, ਸਦਰ ਮੁਕਾਮਾਂ 'ਤੇ ਧਰਨੇ ਮੁਜ਼ਾਹਰਿਆਂ ਦੀ ਲੜੀ ਸ਼ੁਰੂ ਕੀਤੀ ਹੋਈ ਹੈ ਅਤੇ ਅੱਜ ਆਖਰੀ ਦਿਨ ਬਾਬਾ ਬਕਾਲਾ, ਨਕੋਦਰ, ਗੁਰਦਾਸਪੁਰ, ਸਮਾਣਾ, ਕਪੂਰਥਲਾ, ਮੁਕਤਸਰ, ਕੂੰਮ ਕਲਾਂ, ਮਾਨਸਾ, ਸ਼ਹੀਦ ਭਗਤ ਸਿੰਘ ਨਗਰ, ਅਬੋਹਰ ਵਿਖੇ ਰੋਹ ਭਰਪੂਰ ਮੁਜ਼ਾਹਰੇ ਕੀਤੇ ਗਏ।
ਸਾਥੀ ਪਾਸਲਾ ਅਤੇ ਦੂਜੇ ਪਾਰਟੀ ਆਗੂਆਂ ਨੇ ਕਿਹਾ ਕਿ ਪੰਜਾਬ ਦੇ ਕਿਰਤੀ ਕਿਸਾਨਾਂ ਦੇ ਅਤੀ ਗੰਭੀਰ ਮਸਲੇ ਜਿਵੇਂ ਕਿ ਨਿੱਤ ਹੋ ਰਹੀਆਂ ਖੁਦਕੁਸ਼ੀਆਂ, ਕਰਜ਼ਾ, ਬੇਰੋਜ਼ਗਾਰੀ ਤੇ ਨਸ਼ਿਆਂ ਨਾਲ ਬੇਹਾਲ ਨੌਜਵਾਨੀ, ਸਕੂਲਾਂ, ਹਸਪਤਾਲਾਂ ਤੇ ਹੋਰ ਜਨਤਕ ਅਦਾਰਿਆਂ ਦੀ ਮਾੜੀ ਹਾਲਤ, ਛਾਲਾਂ ਮਾਰ ਕੇ ਵੱਧ ਰਹੀ ਮਹਿੰਗਾਈ ਤੇ ਭੁਖਮਰੀ, ਨਿੱਤ ਵੱਧਦੇ ਅਪਰਾਧ ਤੇ ਮਾਫੀਆ ਲੁੱਟ, ਚੁਫੇਰੇ ਫੈਲੀ ਲਾਕਾਨੂੰਨੀ ਅਤੇ ਭ੍ਰਿਸ਼ਟਾਚਾਰ ਆਦਿ ਸਭ ਵਿਸਾਰ ਕੇ ਪੰਜਾਬ ਵਿਧਾਨ ਸਭਾ ਨੂੰ ਅਣਮਨੁੱਖੀ ਜ਼ੋਰ ਅਜਮਾਈ ਅਤੇ ਭੱਦੀ ਸ਼ਬਦਾਵਲੀ ਦਾ ਅਖਾੜਾ ਬਣਾਇਆ ਜਾ ਰਿਹਾ ਹੈ ਜੋ ਕਿ ਅਤੀ ਨਿੰਦਣਯੋਗ ਹੈ। ਕਮਿਊਨਿਸਟ ਆਗੂਆਂ ਨੇ ਪੰਜਾਬ ਦੇ ਲੋਕਾਂ ਨੂੰ ਭਾਵਪੂਰਤ ਅਪੀਲ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੇ ਹਿੱਤਾਂ ਦੀ ਰਾਖੀ ਦੀ ਆਸ ਉਕਤ ਪੂੰਜੀਪਤੀ ਜਗੀਰੂ ਹਿਤਾਂ ਦੀਆਂ ਅਲੰਬਰਦਾਰ ਪਾਰਟੀਆਂ ਤੋਂ ਕਰਨੀ ਫਜ਼ੂਲ ਹੈ। ਇਸ ਮੰਤਵ ਲਈ ਲਾਲ ਝੰਡੇ ਦੀ ਅਗਵਾਈ ਵਾਲੀ ਜੁਝਾਰੂ ਅਤੇ ਪ੍ਰਗਤੀਸ਼ੀਲ ਲਹਿਰ ਦੀ ਮਜ਼ਬੂਤੀ ਅਤੇ ਪਸਾਰ ਹੀ ਇਕੋ ਇਕ ਲਾਜ਼ਮੀ ਸ਼ਰਤ ਹੈ।
ਪਾਰਟੀ ਆਗੂਆਂ ਨੇ ਕਿਹਾ ਕਿ ਉਪਰੋਕਤ ਧਰਨੇ ਦੇਸ਼ ਭਰ 'ਚ ਦਲਿਤਾਂ ਉਪਰ ਹੋ ਰਹੇ ਜਾਤੀਪਾਤੀ ਜ਼ੁਲਮਾਂ, ਘੱਟ ਗਿਣਤੀਆਂ ਤੇ ਯੋਜਨਾਬੱਧ ਢੰਗ ਨਾਲ ਬਰਪਾਏ ਜਾ ਰਹੇ ਫਿਰਕੂ ਹਿੰਸਾ ਦੇ ਕਹਿਰ ਅਤੇ ਔਰਤਾਂ 'ਤੇ ਹੋ ਰਹੇ ਹਿੰਸਕ ਹਮਲਿਆਂ ਤੇ ਲਿੰਗ ਅਧਾਰਿਤ ਵਿਤਕਰਿਆਂ ਨੂੰ ਸਖਤੀ ਨਾਲ ਰੋਕੇ ਜਾਣ ਅਤੇ ਪੀੜਤਾਂ ਨੂੰ ਢੁੱਕਵੇਂ ਮੁਆਵਜ਼ੇ ਸਹਿਤ ਉਨ੍ਹਾਂ ਦੇ ਮੁਕੰਮਲ ਮੁੜ ਵਸੇਬੇ ਦੀ ਮੰਗ ਲਈ ਕੀਤੇ ਜਾ ਰਹੇ ਹਨ ਅਤੇ ਇਹ ਸੰਘਰਸ਼ ਹੋਰ ਉਚੇਚੇ ਪੱਧਰ 'ਤੇ ਜਾਰੀ ਰੱਖਿਆ ਜਾਵੇਗਾ।
ਉਕਤ ਧਰਨਿਆਂ ਦਾ ਇਕ ਮਕਸਦ ਇਹ ਵੀ ਸੀ ਕਿ ਕੇਂਦਰ ਦੀ ਭਾਜਪਾ ਅਤੇ ਪੰਜਾਬ ਦੀ ਕਾਂਗਰਸ ਪਾਰਟੀ ਵਲੋਂ ਕ੍ਰਮਵਾਰ ਲੋਕ ਸਭਾ ਅਤੇ ਪੰਜਾਬ ਵਿਧਾਨ ਸਭਾ ਚੋਣਾਂ ਜਿੱਤਣ ਲਈ, ਲੋਕਾਂ ਨਾਲ ਕੀਤੇ ਗਏ ਵਾਅਦੇ ਲਾਗੂ ਕਰਵਾਉਣ ਲਈ ਵਿਸ਼ਾਲ ਜਨਤਕ ਅੰਦੋਲਨ ਰਾਹੀਂ ਮਜ਼ਬੂਰ ਕੀਤਾ ਜਾ ਸਕੇ। ਧਰਨਿਆਂ-ਮੁਜ਼ਾਹਰਿਆਂ 'ਚ ਕਿਰਤੀ ਲੋਕ ਵਿਸ਼ੇਸ਼ ਕਰ ਔਰਤਾਂ ਅਤੇ ਨੌਜਵਾਨ ਝੋਨੇ ਦਾ ਰੁਝੇਵੇਂ ਭਰਿਆ ਸੀਜਨ ਹੋਣ ਦੇ ਬਾਵਜੂਦ ਭਾਰੀ ਗਿਣਤੀ 'ਚ ਸ਼ਮੂਲੀਅਤ ਕਰ ਰਹੇ ਹਨ ਜੋ ਇਸ ਗੱਲ ਦਾ ਸੂਚਕ ਹੈ ਕਿ ਭਵਿੱਖ 'ਚ ਪੰਜਾਬੀ ਮੁੱਦਿਆਂ ਅਧਾਰਤ ਹਾਂ ਪੱਖੀ ਲਹਿਰ ਨੂੰ ਬਲ ਬਖਸ਼ਣਗੇ।
ਕਮਿਊਨਿਸਟ ਆਗੂਆਂ ਨੇ ਕੇਂਦਰੀ ਵਜ਼ੀਰ ਵੈਕੱਈਆ ਨਾਇਡੂ ਵਲੋਂ ਦਿੱਤੇ ਬਿਆਨ, ਜਿਸ ਵਿਚ ਉਨ੍ਹਾਂ ਕਿਹਾ ਹੈ ਕਿ ''ਕਰਜ਼ਾ ਮੁਆਫੀ ਦੀ ਮੰਗ ਇਕ ਫੈਸ਼ਨ ਬਣ ਗਈ ਹੈ'', ਦੀ ਘੋਰ ਨਿਖੇਧੀ ਕਰਦਿਆਂ ਕਿਹਾ ਕਿ ਇਹ ਸਰਕਾਰ ਚਲਾ ਰਹੀ ਪਾਰਟੀ ਦੀ ਘੋਰ ਲੋਕ ਵਿਰੋਧੀ ਮਾਨਸਿਕਤਾ ਦਾ ਪ੍ਰਗਟਾਵਾ ਹੈ। ਉਨ੍ਹਾਂ ਸਵਾਲ ਕੀਤਾ ਕਿ ਇਹੀ ਸਰਕਾਰ ਕਾਰਪੋਰੇਟ ਘਰਾਣਿਆਂ ਦੇ ਲੱਖਾਂ ਕਰੋੜ ਰੁਪਏ ਦੇ ਕਰਜ਼ਿਆਂ 'ਤੇ ਕਿਵੇਂ ਬਿਨਾਂ ਸ਼ਰਤ ਲੀਕ ਮਾਰੀ ਜਾ ਰਹੀ ਹੈ?
ਸਾਥੀ ਪਾਸਲਾ ਤੋਂ ਇਲਾਵਾ ਗੁਰਨਾਮ ਸਿੰਘ ਦਾਊਦ, ਲਾਲ ਚੰਦ ਕਟਾਰੂਚੱਕ, ਕੁਲਵੰਤ ਸਿੰਘ ਸੰਧੂ, ਜਗਜੀਤ ਸਿੰਘ ਜੱਸੇਆਣਾ, ਮੋਹਣ ਸਿੰਘ ਧਮਾਣਾ, ਲਾਲ ਚੰਦ ਸਰਦੂਲਗੜ੍ਹ, ਛੱਜੂ ਰਾਮ ਰਿਸ਼ੀ, ਸੋਹਣ ਸਿੰਘ ਸਲੇਮਪੁਰੀ, ਗੁਰਮੇਜ ਗੇਜੀ, ਪੂਰਨ ਚੰਦ, ਰਘਬੀਰ ਸਿੰਘ ਬੈਨੀਪਾਲ, ਦਰਸ਼ਨ ਨਾਹਰ, ਜਸਵਿੰਦਰ ਢੇਸੀ, ਮਨੋਹਰ ਸਿੰਘ ਗਿੱਲ ਨੇ ਵੱਖੋ-ਵੱਖ ਥਾਈਂ ਇਕੱਤਰਤਾਵਾਂ ਨੂੰ ਸੰਬੋਧਨ ਕੀਤਾ।
ਜਾਰੀ ਕਰਤਾ

(ਰਵੀ ਕੰਵਰ)

ਫਿਲੌਰ, ਪਠਾਨਕੋਟ, ਮਹਿਲ ਕਲਾਂ, ਰਾਏਕੋਟ, ਸੰਗਰੂਰ, ਆਨੰਦਪੁਰ ਸਾਹਿਬ 'ਚ ਤਹਿਸੀਲ ਪੱਧਰੀ ਮੁਜ਼ਹਾਰੇ ਕੀਤੇ

ਜਲੰਧਰ, 22 ਜੂਨ - ''ਕਿਸੇ ਸਮੇਂ ਖੁਸ਼ਹਾਲੀ ਅਤੇ ਜਿੰਦਾਦਿਲੀ ਦਾ ਪ੍ਰਤੀਕ ਕਹਾਉਣ ਵਾਲਾ ਸੂਬਾ ਪੰਜਾਬ ਅੱਜ ਖੁਦਕੁਸ਼ੀਆਂ ਦੀ ਉਚ ਦਰ ਕਾਰਨ ਸੰਸਾਰ ਭਰ 'ਚ ਬਦਨਾਮ ਹੋ ਚੁੱਕਾ ਹੈ। '' ਇਹ ਸ਼ਬਦ ਅੱਜ ਫਿਲੌਰ, ਪਠਾਨਕੋਟ, ਮਹਿਲ ਕਲਾਂ, ਰਾਏਕੋਟ, ਸੰਗਰੂਰ, ਆਨੰਦਪੁਰ ਸਾਹਿਬ ਵਿਖੇ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ.ਐਮ.ਪੀ.ਆਈ.) ਵਲੋਂ ਕੀਤੇ ਗਏ ਤਹਿਸੀਲ ਪੱਧਰੀ ਮੁਜ਼ਾਹਰਿਆਂ ਤੋਂ ਪਹਿਲਾਂ ਕੀਤੀਆਂ ਗਈਆਂ ਵਿਸ਼ਾਲ ਰੈਲੀਆਂ ਨੂੰ ਸੰਬੋਧਨ ਕਰਦਿਆਂ ਪਾਰਟੀ ਦੇ ਉਚ ਆਗੂਆਂ ਨੇ ਕਹੇ। ਆਗੂਆਂ ਨੇ ਕਿਹਾ ਕਿ ਅੱਜ ਦੇ ਸਾਰੇ ਹੀ ਪੰਜਾਬੀ ਅਖਬਾਰਾਂ 'ਚ ਲੱਗੀਆਂ, ਸੂਬੇ ਦੇ ਵੱਖੋ ਵੱਖ ਹਿੱਸਿਆਂ 'ਚੋਂ ਗਰੀਬਾਂ ਵਲੋਂ ਕੀਤੀਆਂ ਖੁਦਕੁਸ਼ੀਆਂ ਦੀਆਂ ਖਬਰਾਂ, ਜ਼ਿਨ੍ਹਾਂ 'ਚ ਕਪੂਰਥਲਾ 'ਚ ਇਕੋ ਟੱਬਰ ਦੇ ਕਈ ਬੱਚਿਆਂ ਦੀ ਖੁਦਕੁਸ਼ੀ ਦੀ ਹਿਰਦੇਵੇਧਕ ਘਟਣਾ ਵੀ ਸ਼ਾਮਲ ਹੈ, ਪੰਜਾਬ ਦੀ ਤ੍ਰਾਸਿਦਕ ਸਥਿਤੀ ਦੀ ਦਰਦਨਾਕ ਕਹਾਣੀ ਬਿਆਨ ਕਰਨ ਲਈ ਕਾਫੀ ਹਨ। ਉਨ੍ਹਾਂ ਕਿਹਾ ਕਿ ਪੰਜਾਬ 'ਚ ਮਜ਼ਦੂਰ ਕਿਸਾਨ ਖੁਦਕੁਸ਼ੀਆਂ ਤਾਂ ਰੋਜ ਦਾ ਵਰਤਾਰਾ ਹੈਨ ਹੀ ਸਗੋਂ ਹੁਣ ਹੋਰ ਮਿਹਨਤੀ ਭਾਗ ਵੀ ਇਸ ਅਮਾਨਵੀ ਸਵੈਘਾਤ ਵੱਲ ਤੇਜੀ ਨਾਲ ਵੱਧ ਰਹੇ ਹਨ। ਕਮਿਊਨਿਸਟ ਆਗੂਆਂ ਨੇ ਕਿਹਾ ਕਿ ਪਿਛਲੇ ਸੱਤ ਦਹਾਕਿਆਂ ਤੋਂ ਦੇਸ਼ ਦੇ ਹਾਕਮਾਂ ਵਲੋਂ ਅਪਣਾਈਆਂ ਨੀਤੀਆਂ, ਜਿਨ੍ਹਾਂ ਕਰਕੇ ਗਰੀਬ ਹੋਰ ਗਰੀਬ ਅਤੇ ਧਨਾਢ ਹੋਰ ਧਨਾਢ ਹੋਇਆ ਹੈ, ਇਸ ਸਥਿਤੀ ਲਈ ਸਿੱਧੇ ਰੂਪ 'ਚ ਜ਼ਿੰਮੇਵਾਰ ਹਨ ਅਤੇ ਰਹਿੰਦੀ ਖੂੰਹਦੀ ਕਸਰ ਪਿਛਲੇ ਕਰੀਬ ਢਾਈ ਤਿੰਨ ਦਹਾਕਿਆਂ ਤੋਂ ਅਪਣਾਈਆਂ ਗਈਆਂ ਉਦਾਰੀਕਰਣ-ਸੰਸਾਰੀਕਰਣ-ਨਿੱਜੀਕਰਨ ਦੀਆਂ ਨਵਉਦਾਰਵਾਦੀ ਆਰਥਕ ਸਨਅੱਤੀ ਨੀਤੀਆਂ ਨੇ ਕੱਢ ਦਿੱਤੀ ਹੈ। ਉਕਤ ਨੀਤੀਆਂ ਨੇ ਦੇਸ਼ ਦੇ ਕੁਦਰਤੀ ਖਜਾਨਿਆਂ ਅਤੇ ਹੁਣ ਤੱਕ ਉਸਾਰੇ ਗਏ ਅਧਾਰਭੂਤ ਢਾਂਚੇ ਦੀ ਬੇਤਰਸ ਲੁੱਟ ਦੇ ਰਸਤੇ ਦੇਸੀ-ਬਦੇਸ਼ੀ ਕਾਰਪੋਰੇਟ ਘਰਾਣਿਆਂ, ਬਹੁਕੌਮੀ ਕਾਰਪੋਰੇਸ਼ਨਾਂ ਅਤੇ ਸਾਮਰਾਜੀ ਵਿੱਤੀ ਅਦਾਰਿਆਂ ਲਈ ਚੋੜ ਚੌਪੱਟ ਕਰ ਦਿੱਤੇ ਹਨ।
ਉਨ੍ਹਾਂ ਕਿਹਾ ਕਿ ਉਕਤ ਅਣਮਨੁੱਖੀ ਲੁੱਟ ਜਾਰੀ ਰੱਖਣ ਲਈ ਦੇਸ਼ 'ਤੇ ਰਾਜ ਕਰ ਰਹੀ ਪਾਰਟੀ ਭਾਜਪਾ ਅਤੇ ਉਸ ਦੇ ਘ੍ਰਿਣਾਯੋਗ ਮਾਰਗਦਰਸ਼ਕ ਆਰ.ਐਸ.ਐਸ. ਫਿਰਕੂ ਧਰੁਵੀਕਰਣ ਤੇ ਫਿਰਕੂ ਦੰਗਿਆਂ ਦੇ ਅਧਾਰ 'ਤੇ ਦੇਸ਼ ਦੇ ਲੋਕਾਂ ਨੂੰ ਧਰਮ ਦੇ ਅਧਾਰ 'ਤੇ ਵੰਡ ਰਹੇ ਹਨ ਅਤੇ ਕੱਟੜ ਹਿੰਦੂ ਰਾਸ਼ਟਰ ਕਾਇਮ ਕਰਨ ਲਈ ਹਰ ਹੀਲਾ ਵਰਤ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਆਰ.ਐਸ.ਐਸ ਭਾਰਤੀ ਕਿਰਤੀਆਂ ਨੂੰ ਸਦੀਆਂ ਪਹਿਲਾਂ ਜਾਤੀ ਦੇ ਅਧਾਰ 'ਤੇ ਲੀਰੋ ਲੀਰ ਕਰਨ ਵਾਲੀ ਮਨੂਸਮਿਰਤੀ ਮੁੜ ਲਾਗੂ ਕਰਨ ਲਈ ਯਤਨਸ਼ੀਲ ਹੈ। ਦੇਸ਼ ਪਰ 'ਚ ਦਲਿਤਾਂ, ਘੱਟ ਗਿਣਤੀਆਂ ਅਤੇ ਔਰਤਾਂ 'ਤੇ ਹੋ ਰਹੇ ਜਾਤੀਪਾਤੀ ਅਤਿਆਚਾਰਾਂ-ਫਿਰਕੂ ਹਿੰਸਾ, ਜਿਨਸੀ ਅਪਰਾਧਾਂ ਅਤੇ ਲਿੰਗ ਅਧਾਰਿਤ ਵਿਤਕਰੇ ਦੀਆਂ ਘਟਨਾਵਾਂ ਲਈ ਉਪਰੋਕਤ ਸਾਜਿਸ਼ੀ ਨੀਤੀ ਚੌਖਟਾ ਹੀ ਜਿੰਮੇਵਾਰ ਹੈ। ਉਨ੍ਹਾਂ ਦੋਸ਼ ਲਾਇਆ ਕਿ ਆਰ.ਐਸ.ਐਸ. ਅਤੇ ਇਸ ਦੇ ਸਹਿਯੋਗੀ ਸੰਗਠਨਾਂ ਦੇ ਕਾਰਕੁੰਨ, ਜਿਨ੍ਹਾਂ 'ਚੋਂ ਅਨੇਕਾਂ ਦਾ ਅਪਰਾਧਕ ਪਿਛੋਕੜ ਹੈ, ਕੇਂਦਰ 'ਚ ਅਤੇ ਅਨੇਕਾਂ ਸੂਬਿਆਂ 'ਚ ਭਾਜਪਾ ਸਰਕਾਰਾਂ ਹੋਣ ਦਾ ਲਾਭ ਲੈ ਕੇ ਦਲਿਤਾਂ-ਔਰਤਾਂ ਅਤੇ ਘਟ ਗਿਣਤੀਆਂ ਦਾ ਘਾਣ ਕਰ ਰਹੇ ਹਨ।
ਆਗੂਆਂ ਨੇ ਦੱਸਿਆ ਕਿ ਪਾਰਟੀ ਵਲੋਂ ਸੂਬੇ ਦੇ ਸਭਨਾ ਤਹਿਸੀਲ ਹੈਡ ਕੁਆਰਟਰਾਂ 'ਤੇ ਮੁਜ਼ਾਹਰੇ ਉਪਰੋਕਤ ਲੋਕ ਦੋਖੀ ਨੀਤੀ ਚੌਖਟੇ ਵਿਰੁੱਧ 19 ਤੋਂ 23 ਜੂਨ ਤੱਕ ਕੀਤੇ ਜਾ ਰਹੇ ਹਨ ਅਤੇ ਇਸ ਤੋਂ ਬਾਅਦ ਅਗਲੇਰੇ ਪੱਧਰ ਦੇ ਸੰਗਰਾਮ ਉਲੀਕੇ ਜਾਣਗੇ। ਕਮਿਊਨਿਸਟ ਆਗੂਆਂ ਨੇ ਦੱਸਿਆ ਕਿ ਕੇਂਦਰ ਦੀ ਭਾਜਪਾ ਅਤੇ ਸੂਬੇ ਦੀ ਕਾਂਗਰਸ ਹਕੂਮਤ ਵਲੋਂ ਵੋਟ ਪ੍ਰਾਪਤੀ ਲਈ ਕੀਤੇ ਗਏ ਅਤੇ ਗੱਦੀ 'ਤੇ ਬੈਠਣ ਸਾਰ ਅਸਲੋਂ ਹੀ ਵਿਸਾਰ ਦਿੱਤੇ ਗਏ ਚੋਣ ਵਾਅਦੇ ਲਾਗੂ ਕਰਾਉਣ ਲਈ ਵਿਸਾਲ ਜਨ ਲਾਮਬੰਦੀ ਅਧਾਰਤ ਜਨ ਸੰਗਰਾਮਾਂ ਦੀ ਉਸਾਰੀ ਉਕਤ ਸੰਘਰਸ਼ ਦਾ ਦੂਜਾ ਵੱਡਾ ਮਕਸਦ ਹੈ।
ਸਭਨਾਂ ਨੇ ਸੂਬਾ ਹਕੂਮਤ ਦੇ ਕਰਜ਼ਾ ਮੁਆਫੀ ਦੇ ਅੱਧੇ ਪਚੱਧੇ ਐਲਾਨਾਂ ਅਤੇ ਖੇਤ ਮਜ਼ਦੂਰਾਂ ਨੂੰ ਇਸ ਰਿਆਇਤ ਤੋਂ ਅਸਲੋਂ ਹੀ ਵਾਂਝੇ ਰੱਖਣ ਦੀ ਜ਼ੋਰਦਾਰ ਨਿਖੇਧੀ ਕਰਦਿਆਂ ਮੁਕੰਮਲ ਕਰਜ਼ ਮੁਆਫੀ ਦੀ ਮੰਗ ਕੀਤੀ।
ਰੈਲੀਆਂ ਵਿਚ ਇਕੱਤਰ ਕਿਰਤੀ, ਕਿਸਾਨਾਂ, ਔਰਤਾਂ ਨੇ ਸਾਰੇ ਥਾਂਈਂ ਰੋਹ ਭਰਪੂਰ ਮੁਜ਼ਾਹਰੇ ਵੀ ਕੀਤੇ।
ਇਕੱਤਰਤਾਵਾਂ ਨੂੰ ਹੋਰਨਾਂ ਤੋਂ ਇਲਾਵਾ ਸਾਥੀ ਮੰਗਤ ਰਾਮ ਪਾਸਲਾ ਜਨਰਲ ਸਕੱਤਰ, ਲਾਲ ਚੰਦ ਕਟਾਰੂਚੱਕ, ਕੁਲਵੰਤ ਸਿੰਘ ਸੰਧੂ, ਭੀਮ ਸਿੰਘ ਆਲਮਪੁਰ (ਸਾਰੇ ਸੂਬਾ ਸਕੱਤਰੇਤ ਮੈਂਬਰਾਨ), ਜਸਵਿੰਦਰ ਢੇਸੀ, ਗੱਜਣ ਸਿੰਘ ਦੁੱਗਾਂ, ਮਲਕੀਤ ਸਿੰਘ ਵਜੀਦਕੇ, ਨੱਥਾ ਸਿੰਘ, ਸ਼ਿਵ ਕੁਮਾਰ, ਹਰਿੰਦਰ ਸਿੰਘ ਰੰਧਾਵਾ, ਨੀਲਮ ਘੁਮਾਣ ਨੇ ਵੀ ਸੰਬੋਧਨ ਕੀਤਾ।
ਜਾਰੀ ਕਰਤਾ

(ਰਵੀ ਕੰਵਰ)
94643-36019

ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ ਵੱਲੋਂ ਅਜਨਾਲਾ, ਸਰਦੂਲਗੜ੍ਹ, ਸ਼ਾਹਕੋਟ, ਬਟਾਲਾ ਵਿਖੇ ਜਥੇਬੰਦ ਕੀਤੇ ਗਏ ਰੋਸ ਮੁਜ਼ਾਹਰੇ

ਜਲੰਧਰ , 21 ਜੂਨ - ਚੋਣਾਂ ਵੇਲੇ ਲਾਇਆ ਗਿਆ ਕਰਜ-ਮੁਆਫੀ ਦਾ ਲਾਰਾ ਅਤੇ ਮੌਜੂਦਾ ਵਿਧਾਨ ਸਭਾ ਦੇ ਪਲੇਠੇ ਬਜਟ ਦਾ ਝਲਕਾਰਾ, ਸੂਬੇ ਦੀ ਹਕੂਮਤ 'ਤੇ ਕਾਬਜ਼ ਕਾਂਗਰਸ ਪਾਰਟੀ ਦੇ ਕਹਿਣੀ ਅਤੇ ਕਰਨੀ ਦੇ ਪਾੜੇ ਦਾ ਮੂੰਹੋਂ ਬੋਲਦਾ ਸਬੂਤ ਹੈ'', ਇਹ ਸ਼ਬਦ ਅੱਜ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ ਵੱਲੋਂ ਅਜਨਾਲਾ, ਸਰਦੂਲਗੜ੍ਹ, ਸ਼ਾਹਕੋਟ, ਬਟਾਲਾ ਵਿਖੇ ਜਥੇਬੰਦ ਕੀਤੇ ਗਏ ਰੋਸ ਮੁਜ਼ਾਹਰਿਆਂ ਤੋਂ ਪਹਿਲਾਂ ਹੋਈਆਂ ਰੈਲੀਆਂ ਨੂੰ ਸੰਬੋਧਨ ਕਰਦਿਆਂ ਪਾਰਟੀ ਆਗੂਆਂ ਨੇ ਕਹੇ। ਉਨ੍ਹਾਂ ਦੋਸ਼ ਲਾਇਆ ਕਿ ਕਿਸਾਨਾਂ ਦੀ ਨਾਮਾਤਰ ਕਰਜ਼-ਮੁਆਫੀ ਅਤੇ ਖੇਤ ਮਜਦੂਰਾਂ ਨੂੰ ਇਸ ਰਿਆਇਤ ਤੋਂ ਪੂਰੀ ਤਰ੍ਹਾਂ ਵਾਂਝੇ ਰੱਖਣਾ ਸੂਬਾ ਹਕੂਮਤ ਦੀ ਸਰਾਸਰ ਵਾਅਦਾ ਖਿਲਾਫੀ ਹੈ ਅਤੇ ਪਾਰਟੀ ਇਸ ਵਿਰੁੱਧ ਲਗਾਤਾਰ ਪੜਾਅਵਾਰ ਸੰਘਰਸ਼ ਜਾਰੀ ਰੱਖੇਗੀ।
ਕਮਿਊਨਿਸਟ ਆਗੂਆਂ ਨੇ ਕਿਹਾ ਕਿ ਦੇਸੀ-ਬਦੇਸ਼ੀ ਕਾਰਪੋਰੇਟ ਘਰਾਣਿਆਂ, ਬਹੁਕੌਮੀ ਕਾਰਪੋਰੇਸ਼ਨਾਂ ਅਤੇ ਸਾਮਰਾਜੀ ਵਿੱਤੀ ਸੰਸਥਾਵਾਂ ਵਲੋਂ ਦੇਸ਼ ਦੇ ਕੁਦਰਤੀ ਵਸੀਲਿਆਂ ਦੀ ਚੌਤਰਫਾ ਲੁੱਟ ਨੂੰ ਯਕੀਨੀ ਬਣਾਏ ਜਾਣ ਲਈ, ਕੇਂਦਰ ਦੀ ਮੋਦੀ ਸਰਕਾਰ, ਭਾਜਪਾ ਤੇ ਇਸ ਦੇ ਸਹਿਯੋਗੀ ਸੰਗਠਨ ਜਮਹੂਰੀਅਤ ਦੀ ਥਾਂ ਤਾਨਾਸ਼ਾਹੀ, ਧਰਮ ਨਿਰਪੱਖਤਾ ਦੀ ਥਾਂ ਫਿਰਕਾਪ੍ਰਸਤੀ ਅਤੇ ਹਕੀਕੀ ਰਾਸ਼ਟਰਵਾਦ ਦੀ ਥਾਂ ਅੰਨ੍ਹੇ ਕੌਮਵਾਦ ਦਾ ਬੋਲਬਾਲਾ ਕਾਇਮ ਕਰਨ 'ਚ ਲੱਗੇ ਹੋਏ ਹਨ। ਉਨ੍ਹਾਂ ਕਿਹਾ ਕਿ ਉਕਤ ਸਾਰਾ ਕੁੱਝ ਕੱਟੜ ਹਿੰਦੂ ਰਾਸ਼ਟਰ ਦੀ ਸਥਾਪਨਾ ਦੇ ਕੋਝੇ ਉਦੇਸ਼ ਅਧੀਨ ਆਰ.ਐਸ.ਐਸ. ਦੇ ਇਸ਼ਾਰੇ 'ਤੇ ਕੀਤਾ ਜਾ ਰਿਹਾ ਹੈ।
ਧਰਨਿਆਂ ਨੂੰ ਪਾਰਟੀ ਦੇ ਜਨਰਲ ਸਕੱਤਰ ਸਾਥੀ ਮੰਗਤ ਰਾਮ ਪਾਸਲਾ, ਸੂਬਾ ਸਕੱਤਰੇਤ ਮੈਂਬਰਾਨ ਸਰਵ ਸਾਥੀ ਕੁਲਵੰਤ ਸਿੰਘ ਸੰਧੂ, ਰਤਨ ਸਿੰਘ ਰੰਧਾਵਾ, ਸਤਨਾਮ ਸਿੰਘ ਅਜਨਾਲਾ, ਲਾਲ ਚੰਦ ਕਟਾਰੂਚੱਕ; ਸੂਬਾ ਕਮੇਟੀ ਮੈਂਬਰਾਨ ਸਾਥੀ ਲਾਲ ਚੰਦ ਸਰਦੂਲਗੜ੍ਹ, ਜਸਵਿੰਦਰ ਸਿੰਘ ਢੇਸੀ, ਮਨੋਹਰ ਸਿੰਘ ਗਿੱਲ, ਦਰਸ਼ਨ ਨਾਹਰ ਤੋਂ ਇਲਾਵਾ ਸਥਾਨਕ ਆਗੂਆਂ ਨੇ ਵੀ ਸੰਬੋਧਨ ਕੀਤਾ।
ਉਕਤ ਤਹਿਸੀਲ ਪੱਧਰੀ ਧਰਨੇ 23 ਜੂਨ ਤੱਕ ਜਾਰੀ ਰਹਿਣਗੇ ਅਤੇ ਉਸ ਪਿਛੋਂ ਅਗਲੇ ਪੜਾਅ ਦੀ ਰੂਪ ਰੇਖਾ ਦਾ ਐਲਾਨ ਬਾਅਦ 'ਚ ਕੀਤਾ ਜਾਵੇਗਾ।
ਮੁਜ਼ਾਹਰਾਕਾਰੀ ਮੰਗ ਕਰ ਰਹੇ ਸਨ ਕਿ ਕੇਂਦਰ ਅਤੇ ਸੂਬਾ ਹਕੂਮਤ ਸਭਨਾ ਨੂੰ ਰੋਜ਼ਗਾਰ, ਸਿੱਖਿਆ, ਸਿਹਤ ਸਹੂਲਤਾਂ, ਮਕਾਨ ਬਨਾਉਣ ਲਈ ਥਾਂ ਅਤੇ ਗਰਾਂਟ, ਸਨਮਾਨਯੋਗ ਬੁਢਾਪਾ, ਵਿਧਵਾ-ਅੰਗਹੀਨ ਪੈਨਸ਼ਨਾਂ, ਰੇਤਾ ਬੱਜਰੀ ਸਮੇਤ ਹਰ ਕਿਸਮ ਦੇ ਮਾਫੀਆ-ਅਪਰਾਧਾਂ ਅਤੇ ਕੁਰੱਪਸ਼ਨ ਤੋਂ ਮੁਕਤੀ, ਕਿਸਾਨਾਂ-ਮਜ਼ਦੂਰਾਂ ਦੀ ਮੁਕੰਮਲ ਕਰਜ ਮਾਫੀ ਦੇ ਵਾਅਦੇ ਇਨ ਬਿਨ ਲਾਗੂ ਕਰਨ।
ਜਾਰੀ ਕਰਤਾ

(ਰਵੀ ਕੰਵਰ)

ਗੁਰਬਤ ਦੀ ਜੂਨ ਹੰਢਾਅ ਰਹੇ ਬੇਜ਼ਮੀਨੇ ਮਜ਼ਦੂਰਾਂ ਅਤੇ ਦਲਿਤਾਂ ਨੂੰ ਉਕਾ ਹੀ ਨਜ਼ਰਅੰਦਾਜ਼ ਕਰ ਦੇਣ ਦੀ ਨਿਖੇਧੀ

ਜਲੰਧਰ , 20 ਜੂਨ - ''ਪੰਜਾਬ ਸਰਕਾਰ ਵਲੋਂ, ਬੀਤੇ ਕੱਲ੍ਹ ਐਲਾਨੇ ਗਏ, ਅੱਧੇ ਅਧੂਰੇ ਕਰਜ਼ ਮਾਫੀ ਦੇ ਐਲਾਨਾਂ 'ਚ ਸੂਬੇ ਦੇ ਖੇਤੀ ਅਰਥਚਾਰੇ 'ਤੇ ਨਿਰਭਰ ਅਤੇ ਸਭ ਤੋਂ ਵਧੇਰੇ ਗੁਰਬਤ ਦੀ ਜੂਨ ਹੰਢਾਅ ਰਹੇ ਬੇਜ਼ਮੀਨੇ ਮਜ਼ਦੂਰਾਂ ਅਤੇ ਦਲਿਤਾਂ ਨੂੰ ਉਕਾ ਹੀ ਨਜ਼ਰਅੰਦਾਜ਼ ਕਰ ਦੇਣਾ, ਸੂਬਾ ਹਕੂਮਤ ਦੀ ਘੋਰ ਨਿੰਦਣਯੋਗ ਕਾਰਵਾਈ ਹੈ।'' ਇਹ ਗੱਲ ਅੱਜ ਇੱਥੋਂ ਜਾਰੀ ਇਕ ਬਿਆਨ ਰਾਹੀਂ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ.ਐਮ.ਪੀ.ਆਈ.) ਦੇ ਜਨਰਲ ਸਕੱਤਰ ਸਾਥੀ ਮੰਗਤ ਰਾਮ ਪਾਸਲਾ ਨੇ ਕਹੀ। ਉਨ੍ਹਾਂ ਕਿਹਾ ਕਿ ਬੇਜ਼ਮੀਨੇ/ਦਲਿਤਾਂ ਸਿਰ ਚੜ੍ਹੇ ਸਮੁੱਚੇ ਕਰਜ਼ਿਆਂ 'ਚੋਂ ਕੇਵਲ ਅਨੁਸੂਚਿਤ ਜਾਤੀ ਕਾਰਪੋਰੇਸ਼ਨ ਤੋਂ ਲਏ ਕਰਜ਼ੇ ਸਾਫ ਕਰਨਾ, ''ਊਠ ਤੋਂ ਛਾਨਣੀ ਲਾਹੁਣ'' ਦੀ ਮਿਸਾਲ ਤੋਂ ਵੀ ਨਿਗੂਣੀ ਰਾਹਤ ਹੈ। ਸਾਥੀ ਪਾਸਲਾ ਨੇ ਕਿਹਾ ਕਿ ਕਿਸਾਨਾਂ ਦੇ ਹੱਦ ਕਰਜ਼ੇ ਕੁੱਲ ਕਰਜ਼ਿਆਂ ਦਾ ਇਕ ਬਹੁਤ ਛੋਟਾ ਭਾਗ ਹੈ। ਇਸ ਮੁਆਫੀ ਦੇ ਐਲਾਨ ਵਿਚ ਸ਼ਾਹੂਕਾਰਾਂ ਅਤੇ ਅਜਿਹੇ ਹੋਰ ਕਰਜ਼ਿਆਂ ਦਾ ਕਿਧਰੇ ਵੀ ਜ਼ਿਕਰ ਤੱਕ ਨਹੀਂ। ਉਨ੍ਹਾਂ ਇਹ ਵੀ ਖਦਸ਼ਾ ਜਾਹਿਰ ਕੀਤਾ ਕਿ ਕੀਤੇ ਗਏ ਐਲਾਨਾਂ ਨੂੰ ਅਮਲੀ ਰੂਪ ਦੇਣ ਵੇਲੇ ਅਣਗਿਣਤੀ ਚੋਰ ਮੋਰੀਆਂ ਰਾਹੀਂ ਐਲਾਣੀ ਗਈ ਰਾਹਤ ਨੂੰ ਪਤਾ ਨਹੀਂ ਕਿੰਨੇ ਖੋਰੇ ਲੱਗਣੇ ਹਨ। ਪਿਛਲਾ ਤਜ਼ਰਬਾ ਇਸ ਕਿਸਮ ਦੇ ਖੋਰਿਆਂ ਦੀ ਜਿਊਂਦੀ ਜਾਗਦੀ ਮਿਸਾਲ ਹੈ।
ਕਮਿਊਨਿਸਟ ਆਗੂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਸਮੱਸਿਆ ਦੇ ਬੁਨਿਆਦੀ ਹੱਲ ਵੱਲ ਕੇਂਦਰੀ ਸਰਕਾਰ, ਪੰਜਾਬ ਸਰਕਾਰ ਅਤੇ ਸਮੁੱਚੇ ਸਰਕਾਰੀ ਤੰਤਰ ਨੇ ਪੂਰੀ ਤਰ੍ਹਾਂ ਅੱਖਾਂ ਮੀਟ ਰੱਖੀਆਂ ਹਨ। ਇਸ ਸਮੱਸਿਆ ਦਾ ਪੱਕਾ ਠੱਕਾ ਹੱਲ ਹੈ ਅਜਿਹੀ ਨੀਤੀ, ਜਿਸ ਸਦਕਾ ਕਿਸਾਨਾਂ-ਮਜ਼ਦੂਰਾਂ ਸਿਰ ਕਰਜ਼ਾ ਚੜ੍ਹਨ ਦੀ ਨੌਬਤ ਹੀ ਨਾ ਆਏ। ਇਸ ਨੀਤੀ ਦਾ ਬੁਨਿਆਦੀ ਅਧਾਰ ਹੈ, ਖੇਤੀ 'ਚ ਆਮਦਨ ਖਰਚ ਦੇ ਪਾੜੇ ਨੂੰ ਖਤਮ ਕਰਨਾ। ਦੂਜਾ ਮੁੱਖ ਮੁੱਦਾ ਹੈ ਖੇਤੀ ਕਿੱਤੇ ਵਿਚ ਬੇਵਜ੍ਹਾ ਖੱਪ ਰਹੀ ਕਿਰਤ ਸ਼ਕਤੀ ਲਈ ਬਦਲਵੇਂ ਰੁਜ਼ਗਾਰ ਦਾ ਇੰਤਜਾਮ ਕਰਨਾ। ਪਰ ਅਜੋਕੇ ਆਰਥਿਕ ਮਾਡਲ ਦੀ ਉਪਜ ਰੋਜਗਾਰ ਰਹਿਤ ਵਿਕਾਸ (Jobless Growth) ਦੇ ਚਲਦਿਆਂ ਰੋਜਗਾਰਾਂ ਦੇ ਤਾਂ ਸਗੋਂ ਭੋਗ ਹੀ ਪੈ ਚੁੱਕਾ ਹੈ। ਸਾਥੀ ਪਾਸਲਾ ਨੇ ਸਮੂਹ ਕਿਰਤੀ ਕਿਸਾਨਾਂ ਨੂੰ ਅਪੀਲ ਕੀਤੀ ਕਿ ਸਰਕਾਰ ਵਲੋਂ ਕਰਜਾ ਮਾਫ ਲਈ ਅਪਣਾਏ ਗਏ ਇਸ ਨੀਤੀ ਚੌਖਟੇ ਵਿਰੁੱਧ ਅਤੇ ਖੇਤ ਮਜ਼ਦੂਰਾਂ/ਕਿਸਾਨਾਂ ਦੇ ਹਰ ਕਿਸਮ ਦੇ ਕਰਜ਼ਿਆਂ ਦੇ ਪੂਰੀ ਤਰ੍ਹਾਂ ਖਾਤਮੇਂ ਤੱਕ ਸੰਘਰਸ਼ ਦੇ ਪਿੜ ਮਘਾਈ ਰੱਖਣ। ਉਨ੍ਹਾਂ ਜਮਹੂਰੀ ਅਤੇ ਪ੍ਰਗਤੀਸ਼ੀਲ ਧਿਰਾਂ ਨੂੰ ਉਕਤ ਅੰਦੋਲਨ ਲਈ ਸਰਵਪੱਖੀ ਹਿਮਾਇਤ ਜੁਟਾਉਣ ਦਾ ਵੀ ਸੱਦਾ ਦਿੱਤਾ।

(ਮੰਗਤ ਰਾਮ ਪਾਸਲਾ)

ਆਰ.ਐਮ.ਪੀ.ਆਈ. ਵਲੋਂ ਦੂਜੇ ਦਿਨ ਤਰਨ ਤਾਰਨ, ਹੁਸ਼ਿਆਰਪੁਰ, ਨਰੋਟ ਜੈਮਲ ਸਿੰਘ 'ਚ ਕੀਤੇ ਰੋਸ ਮੁਜ਼ਾਹਰੇ

ਜਲੰਧਰ , 20 ਜੂਨ - 'ਹਾਕਮ ਲੁਟੇਰੀਆਂ ਜਮਾਤਾਂ ਦੇ ਹਿੱਤਾਂ ਦੀ ਰਾਖੀ ਲਈ ਰਾਜ ਭਾਗ ਚਲਾ ਰਹੀਆਂ ਪਾਰਟੀਆਂ ਚੋਣਾਂ ਜਿੱਤਣ ਲਈ ਲੋਕਾਂ ਦੀ ਦੁਖਦੀ ਰਗ 'ਤੇ ਹੱਥ ਰੱਖਣ ਵਾਲੇ ਚੋਣ ਵਾਅਦੇ ਕਰਦੀਆਂ ਹਨ ਅਤੇ ਚੋਣਾਂ ਜਿੱਤਣ ਸਾਰ ਹੀ ਉਕਤ ਵਾਅਦਿਆਂ ਨੂੰ ਬਿਨਾਂ ਦੇਰੀ ਵਿਸਾਰ ਦਿੰਦੀਆਂ ਹਨ।'' ਇਹ ਗੱਲ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ.ਐਮ.ਪੀ.ਆਈ.) ਵਲੋਂ ਤਰਨ ਤਾਰਨ, ਹੁਸ਼ਿਆਰਪੁਰ, ਨਰੋਟ ਜੈਮਲ ਸਿੰਘ ਵਿਖੇ ਕੀਤੇ ਗਏ ਤਹਿਸੀਲ ਪੱਧਰੀ ਮੁਜ਼ਾਹਰਿਆਂ ਤੋਂ ਪਹਿਲਾਂ ਹੋਈਆਂ ਇਕੱਤਰਤਾਵਾਂ ਨੂੰ ਸੰਬੋਧਨ ਕਰਦਿਆਂ ਪਾਰਟੀ ਦੇ ਜਨਰਲ ਸਕੱਤਰ ਸਾਥੀ ਮੰਗਤ ਰਾਮ ਪਾਸਲਾ, ਕੇਂਦਰੀ ਕਮੇਟੀ ਦੇ ਮੈਂਬਰਾਂ ਸਾਥੀ ਹਰਕੰਵਲ ਸਿੰਘ ਅਤੇ ਗੁਰਨਾਮ ਸਿੰਘ ਦਾਊਦ, ਸੂਬਾ ਸਕੱਤਰੇਤ ਦੇ ਮੈਂਬਰਾਂ ਸਾਥੀ ਪਰਗਟ ਸਿੰਘ ਜਾਮਾਰਾਇ ਅਤੇ ਲਾਲ ਚੰਦ ਕਟਾਰੂਚੱਕ, ਸੂਬਾ ਕਮੇਟੀ ਮੈਂਬਰਾਂ ਪ੍ਰਿੰਸੀਪਲ ਪਿਆਰਾ ਸਿੰਘ ਅਤੇ ਮਹਿੰਦਰ ਸਿੰਘ ਖੈਰੜ ਨੇ ਕਹੀ। ਕਮਿਊਨਿਸਟ ਆਗੂਆਂ ਨੇ ਕਿਹਾ ਕਿ ਇਹ ਬੜੇ ਦੁੱਖ ਦੀ ਗੱਲ ਹੈ ਕਿ ਰਾਜਸੀ ਪਾਰਟੀਆਂ ਨੂੰ ਚੋਣ ਵਾਅਦੇ ਪੂਰੇ ਕਰਨ ਲਈ ਮਜ਼ਬੂਰ ਕਰਨ ਵਾਲੀ ਕੋਈ ਸੰਵਿਧਾਨਕ ਵਿਵਸਥਾ ਮੌਜੂਦ ਨਹੀਂ ਹੈ। ਪਰ ਆਰ.ਐਮ.ਪੀ.ਆਈ. ਸੂਬਾ ਅਤੇ ਕੇਂਦਰੀ ਸਰਕਾਰਾਂ 'ਤੇ ਚੋਣ ਵਾਅਦੇ ਲਾਗੂ ਕਰਾਉਣ ਲਈ ਜਨਤਕ ਦਬਾਅ ਬਨਾਉਣ ਹਿੱਤ ਸੰਗਰਾਮਾਂ ਦੀ ਉਸਾਰੀ 'ਚ ਕੋਈ ਕਸਰ ਬਾਕੀ ਨਹੀਂ ਛੱਡੇਗੀ। ਆਗੂਆਂ ਨੇ ਕਿਹਾ ਕਿ ''ਢੋਲ ਗੰਵਾਰ ਸ਼ੂਦਰ ਪਸ਼ੂ ਨਾਰੀ, ਯਿਹ ਸਭ ਹੈ ਤਾੜਣ ਕੇ ਅਧਿਕਾਰੀ'' ਦੇ ਬੁਨਿਆਦੀ ਸਿਧਾਂਤ ਦੀ ਧਾਰਣੀ ਮਨੂਸਿਮਰਤੀ ਅਧਾਰਤ ਸ਼ਾਸ਼ਨ ਭਾਰਤ 'ਚ ਕਾਇਮ ਕਰਨ ਲਈ ਤਰਲੋ ਮੱਛੀ ਹੋ ਰਹੇ ਸੰਘ ਪਰਿਵਾਰ ਦੀ ਹਰ ਸਾਜਿਸ਼ ਦਾ ਡੱਟ ਕੇ ਮੁਕਾਬਲਾ ਕੀਤਾ ਜਾਵੇਗਾ।
ਸਭਨਾ ਸਾਥੀਆਂ ਨੇ ਘੱਟ ਗਿਣਤੀਆਂ 'ਤੇ ਵਰਤਾਈ ਜਾ ਰਹੀ ਫਿਰਕੂ ਹਿੰਸਾ ਅਤੇ ਔਰਤਾਂ 'ਤੇ ਹੋ ਰਹੇ ਵਹਿਸ਼ੀ ਜਿਨਸੀ ਹਮਲਿਆਂ ਨੂੰ ਤੁਰੰਤ ਠੱਲ੍ਹ ਪਾਏ ਜਾਣ ਦੀ ਵੀ ਮੰਗ ਕੀਤੀ। ਉਨ੍ਹਾਂ ਐਲਾਨ ਕੀਤਾ ਕਿ ਇਹ ਸੰਗਰਾਮ ਹੋਰ ਵਧੇਰੇ ਤੇਜ 'ਤੇ ਵਿਸ਼ਾਲ ਕਰਨ ਦੇ ਸਿਰਤੋੜ ਯਤਨ ਕੀਤੇ ਜਾਣਗੇ। ਰੋਸ ਪ੍ਰਦਰਸ਼ਨਾਂ 'ਚ ਔਰਤਾਂ ਵੀ ਭਾਰੀ ਗਿਣਤੀ 'ਚ ਸ਼ਾਮਲ ਹੋਈਆਂ।
ਉਕਤ ਧਰਨੇ ਸਾਰੇ ਪੰਜਾਬ 'ਚ 23 ਜੂਨ ਤੱਕ ਜਾਰੀ ਰਹਿਣਗੇ।

(ਰਵੀ ਕੰਵਰ)