ਦਿੱਲੀ 'ਚ ਏ ਬੀ ਵੀ ਪੀ ਦੀ ਗੁੰਡਾਗਰਦੀ : ਵਿਚਾਰਾਂ ਦੀ ਆਜ਼ਾਦੀ 'ਤੇ ਘਿਨੌਣਾ ਹਮਲਾ

ਜਲੰਧਰ - ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ ਐਮ ਪੀ ਆਈ) ਦੇ ਜਨਰਲ ਸਕੱਤਰ ਕਾਮਰੇਡ ਮੰਗਤ ਰਾਮ ਪਾਸਲਾ ਨੇ ਸੰਘ ਪਰਵਾਰ ਦੇ ਵਿਦਿਆਰਥੀ ਜਥੇਬੰਦੀ ਏ ਬੀ ਵੀ ਪੀ ਦੇ ਗੁੰਡਿਆਂ ਵੱਲੋਂ ਪਿਛਲੇ ਦਿਨੀਂ ਰਾਮਜਸ ਕਾਲਜ ਦਿੱਲੀ ਵਿੱਚ ਕੀਤੀ ਗਈ ਬੁਰਛਾਗਰਦੀ ਉਪਰ ਡੂੰਘੀ ਚਿੰਤਾ ਦਾ ਪ੍ਰਗਟਾਵਾ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਕਾਲਜ ਵੱਲੋਂ ਕਰਵਾਏ ਜਾ ਰਹੇ ਇੱਕ ਸੈਮੀਨਾਰ ਵਿੱਚ ਜੇ ਐਨ ਯੂ ਦੇ ਉੱਘੇ ਵਿਦਿਆਰਥੀ ਆਗੂ ਉਮਰ ਖਾਲਦ ਦੇ ਭਾਸ਼ਣ ਨੂੰ ਰੋਕਣ ਲਈ ਕੀਤੀ ਗਈ ਇਸ ਗੁੰਡਾਗਰਦੀ ਦੀ ਵਿਆਪਕ ਰੂਪ ਵਿੱਚ ਨਿਖੇਧੀ ਕੀਤੀ ਜਾਣੀ ਚਾਹੀਦੀ ਹੈ। ਇਹ ਭਾਰਤੀ ਸੰਵਿਧਾਨ 'ਚ ਦਰਜ ਵਿਚਾਰਾਂ ਦੀ ਆਜ਼ਾਦੀ ਉਪਰ ਇੱਕ ਘਿਨੌਣਾ ਹਮਲਾ ਹੈ। ਸਾਥੀ ਪਾਸਲਾ ਨੇ ਕਿਹਾ ਕਿ ਸਭ ਤੋਂ ਵੱਧ ਚਿੰਤਾ ਦਾ ਵਿਸ਼ਾ ਇਹ ਹੈ ਕਿ ਮੌਕੇ 'ਤੇ ਹਾਜ਼ਰ ਵੱਡੀ ਗਿਣਤੀ ਵਿੱਚ ਪੁਲਸ ਨੇ ਏ ਬੀ ਵੀ ਪੀ ਵੱਲੋਂ ਕੀਤੀ ਜਾ ਰਹੀ ਧੱਕੜਸ਼ਾਹੀ ਨੂੰ ਰੋਕਣ ਦੀ ਬਜਾਏ ਕਾਲਜ ਦੇ ਪ੍ਰਿੰਸੀਪਲ ਤੇ ਸਟਾਫ਼ ਨੂੰ ਹੀ ਬੁਰਾ ਭਲਾ ਕਿਹਾ ਅਤੇ ਸੈਮੀਨਾਰ ਨੂੰ ਅੱਧ ਵਿਚਾਲੇ ਹੀ ਬੰਦ ਕਰਵਾ ਦਿੱਤਾ। ਇਥੋਂ ਤੱਕ ਕਿ ਪੁਲਸ ਅਧਿਕਾਰੀਆਂ ਨੇ ਏ ਬੀ ਵੀ ਪੀ ਦੀ ਹੁਲੜਬਾਜ਼ੀ ਬਾਰੇ ਰਿਪੋਰਟ ਦਰਜ ਕਰਨ ਤੋਂ ਵੀ ਇਨਕਾਰ ਕਰ ਦਿੱਤਾ। ਸਾਥੀ ਪਾਸਲਾ ਨੇ ਕਿਹਾ ਕਿ ਮੋਦੀ ਸਰਕਾਰ ਦੇ ਹੱਥਠੋਕਿਆਂ ਦੀ ਅਜਿਹੀ ਅਸਹਿਣਸ਼ੀਲਤਾ ਦੇਸ਼ ਦੇ ਜਮਹੂਰੀ ਤੇ ਧਰਮ ਨਿਰਪੱਖ ਤਾਣੇ-ਬਾਣੇ ਲਈ ਇੱਕ ਗੰਭੀਰ ਚੁਣੌਤੀ ਹੈ, ਜਿਸ ਦਾ ਟਾਕਰਾ ਸਮੁੱਚੀਆਂ ਦੇਸ਼ ਭਗਤ ਤੇ ਜਮਹੂਰੀ ਸ਼ਕਤੀਆਂ ਨੂੰ ਮਿਲ ਕੇ  ਕਰਨਾ ਹੋਵੇਗਾ। ਸਾਥੀ ਪਾਸਲਾ ਨੇ ਐਲਾਨ ਕੀਤਾ ਕਿ ਆਰ ਐਮ ਪੀ ਆਈ  ਅਜਿਹੇ ਸੰਘਰਸ਼ ਵਿੱਚ ਆਪਣੀ ਸਮਰੱਥਾ ਨਾਲੋਂ ਵੀ ਵੱਧ ਯੋਗਦਾਨ ਪਾਉਣ ਦਾ ਯਤਨ ਕਰੇਗੀ।

23 ਮਾਰਚ ਨੂੰ ''ਸਾਮਰਾਜ ਵਿਰੋਧੀ-ਨਸਲ ਵਿਰੋਧੀ-ਫਿਰਕਾਪ੍ਰਸਤੀ ਵਿਰੋਧੀ'' ਦਿਵਸ ਦੇਸ਼ ਭਰ 'ਚ ਮਨਾਉਣ ਦਾ ਸੱਦਾ

21 ਫਰਵਰੀ ਸੰਸਾਰ ਮਾਤਾ ਭਾਸ਼ਾ ਦਿਵਸ ਅਤੇ 8 ਮਾਰਚ ਕੌਮਾਂਤਰੀ ਇਸਤਰੀ ਦਿਵਸ ਨੂੰ ''ਨਾਰੀ ਅਧਿਕਾਰ ਦਿਵਸ'' ਵਜੋਂ ਮਨਾਉਣ ਦਾ ਐਲਾਨ 

ਜਲੰਧਰ,  17 ਫਰਵਰੀ 2017 - ''ਲੁੱਟ ਅਧਾਰਤ ਪੂੰਜੀਵਾਦੀ ਰਾਜ ਪ੍ਰਬੰਧ ਵਲੋਂ ਸੰਸਾਰ ਭਰ ਦੇ ਕਿਰਤੀਆਂ ਦੇ ਬੁਨਿਆਦੀ ਮਸਲੇ ਹੱਲ ਕਰਨ ਦੀ ਘੋਰ ਅਸਫਲਤਾ ਤੋਂ ਧਿਆਨ ਲਾਂਭੇ ਕਰਨ ਦੇ ਕੋਝੇ ਮਕਸਦ ਅਧੀਨ ਡੋਨਾਲਡ ਟਰੰਪ ਤੋਂ ਲੈ ਕੇ ਨਰਿੰਦਰ ਮੋਦੀ ਤੱਕ ਹੁਕਮਰਾਨ ਲੋਟੂ ਜਮਾਤਾਂ ਦੇ ਸਾਰੇ ਪ੍ਰਤੀਨਿਧੀ ਨਸਲੀ, ਫਿਰਕੂ, ਇਲਾਕਾਈ ਤੇ ਹੋਰ ਫੁੱਟਪਾਊ ਮੁੱਦੇ ਉਭਾਰ ਰਹੇ ਹਨ।'' ਇਹ ਸ਼ਬਦ ਅੱਜ ਇੱਥੇ ਸਾਥੀ ਕੁਲਵੰਤ ਸਿੰਘ ਸੰਧੂ ਦੀ ਪ੍ਰਧਾਨਗੀ ਹੇਠ ਹੋਈ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰਐਮਪੀਆਈ) ਦੀ ਦੋ ਦਿਨਾਂ ਸੂਬਾ ਸਕੱਤਰੇਤ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਪਾਰਟੀ ਦੇ ਜਨਰਲ ਸਕੱਤਰ ਸਾਥੀ ਮੰਗਤ ਰਾਮ ਪਾਸਲਾ ਨੇ ਕਹੇ। ਉਨ੍ਹਾਂ ਕਿਹਾ ਕਿ ਪੂੰਜੀਵਾਦੀ  ਰਾਜ ਪ੍ਰਬੰਧ ਦੀ ਅੰਨ੍ਹੀ ਲੁੱਟ 'ਚੋਂ ਨਿਕਲੇ ਆਰਥਿਕ ਮੰਦਵਾੜੇ ਨਾਲ ਨਜਿੱਠਣ ਲਈ ਸੰਸਾਰ ਭਰ ਦੇ ਕਿਰਤੀ ਕਿਸਾਨਾਂ ਤੇ ਹੋਰ ਮਿਹਨਤੀ ਵਰਗਾਂ ਦੀ ਹੋਰ ਵੀ ਬੇਰਹਿਮ ਲੁੱਟ ਦੇ ਉਦੇਸ਼ ਲਈ ਬਣਾਈਆਂ ਗਈਆਂ ਸਾਮਰਾਜੀ ਸੰਸਾਰੀਕਰਨ ਦੀਆਂ ਨੀਤੀਆਂ ਦੇ ਬੇਰੋਕ ਟੋਕ ਲਾਗੂ ਕੀਤੇ ਜਾਣ ਲਈ ਲੋਕਾਂ ਦਾ ਬੇਲੋੜੇ ਫੁੱਟਪਾਊ ਏਜੰਡੇ 'ਤੇ ਵੰਡੇ ਜਾਣਾ ਸੰਸਾਰ ਦੇ ਸਾਰੇ ਦੇਸ਼ਾਂ ਦੀਆਂ ਹਾਕਮ ਜਮਾਤਾਂ ਦੀ ਲੋੜ ਹੈ, ਇਸ ਲਈ ਟਰੰਪ-ਮੋਦੀ 'ਤੇ ਅਜਿਹੇ ਹੋਰਨਾਂ ਸੱਜ ਪਿਛਾਖੜੀਆਂ ਦੀ ਫਿਰਕੂ, ਨਸਲੀ ਖੂਨੀ ਖੇਡ ਕੋਈ ਅਚਾਨਕ ਵਾਪਰਿਆ ਵਰਤਾਰਾ ਨਹੀਂ ਬਲਕਿ ਵਿਊਂਤਬੱਧ ਸਾਜਿਸ਼ ਹੈ। ਸਾਥੀ ਪਾਸਲਾ ਨੇ ਕਿਹਾ ਕਿ ਨਾ ਕੇਵਲ ਯੂ.ਪੀ., ਪੰਜਾਬ ਅਤੇ ਹੋਰ ਰਾਜਾਂ ਦੀਆਂ ਚੋਣਾਂ ਸਮੇਂ ਬਲਕਿ ਹਰ ਹੀਲੇ ਸੰਘੀ ਸੰਗਠਨਾਂ, ਭਾਜਪਾ ਅਤੇ ਇਸ ਦੇ ਜੋਟੀਦਾਰਾਂ ਵਲੋਂ ਵਾਰ ਵਾਰ ਉਭਾਰੇ ਜਾਂਦੇ ਫਿਰਕੂ ਫੁੱਟਪਾਊ ਮੁੱਦਿਆਂ ਨੂੰ ਇਸ ਨਜ਼ਰੀਏ ਤੋਂ ਘੋਖੇ ਜਾਣ ਦੀ ਜ਼ਰੂਰਤ ਹੈ। ਕਮਿਊਨਿਸਟ ਆਗੂ ਨੇ ਕਿਹਾ ਕਿ ਉਦਾਰੀਕਰਨ, ਸੰਸਾਰੀਕਰਨ, ਨਿੱਜੀਕਰਨ ਦੀਆਂ ਨੀਤੀਆਂ ਰਾਹੀਂ ਮਚਾਈ ਜਾ ਰਹੀ ਅਤੇ ਦਿਨੋਂ ਦਿਨ ਤਿੱਖੀ ਹੁੰਦੀ ਜਾ ਰਹੀ ਜਿਸ ਲੁੱਟ ਤੋਂ ਧਿਆਨ ਲਾਂਭੇ ਕਰਨ ਲਈ ਫਿਰਕੂ ਫੁਟਪਾਊ ਖੂਨੀ ਖੇਡ ਖੇਡੀ ਜਾ ਰਹੀ ਹੈ, ਉਸ ਅਮਾਨਵੀ ਲੁੱਟ ਵਿਰੁੱਧ ਵਿਸ਼ਾਲ ਸਾਂਝੇ ਸੰਗਰਾਮ ਤਿੱਖੇ ਤੋਂ ਤਿਖੇਰੇ ਕਰਨੇ ਅੱਜ ਕਿਰਤੀ ਜਮਾਤਾਂ ਸਾਹਮਣੇ ਮੁੱਢਲਾ ਕਾਰਜ ਹੈ। ਸਾਥੀ ਪਾਸਲਾ ਨੇ ਕਿਹਾ ਕਿ ਉਕਤ ਉਦੇਸ਼ ਦੀ ਪੂਰਤੀ ਲਈ ਆਰ.ਐਮ.ਪੀ.ਆਈ. ਵਲੋਂ ਸੰਸਾਰ ਪ੍ਰਸਿੱਧ ਸ਼ਹੀਦਾਂ ਭਗਤ ਸਿੰਘ, ਰਾਜਗੁਰੂ ਅਤੇ ਸੁਖਦੇਵ ਦੇ ਸ਼ਹੀਦੀ ਦਿਹਾੜੇ 23 ਮਾਰਚ ਨੂੰ ''ਸਾਮਰਾਜ ਵਿਰੋਧੀ-ਨਸਲ ਵਿਰੋਧੀ-ਫਿਰਕਾਪ੍ਰਸਤੀ ਵਿਰੋਧੀ'' ਦਿਵਸ ਵਜੋਂ ਦੇਸ਼ ਭਰ ਵਿਚ ਮਨਾਇਆ ਜਾਵੇਗਾ। ''ਸੂਬਾ ਸਕੱਤਰੇਤ ਨੇ ਇਸ ਦਿਸ਼ਾ ਵਿਚ ਸਮੂਹ ਪਾਰਟੀ ਇਕਾਈਆਂ, ਜਨਸੰਗਠਨਾਂ ਤੇ ਹਮਦਰਦਾਂ ਨੂੰ ਇਹ ਦਿਹਾੜਾ ਹਰ ਪੱਧਰ 'ਤੇ ਵਿਸ਼ਾਲ ਲੋਕ ਭਾਗੀਦਾਰੀ ਯਕੀਨੀ ਬਨਾਉਂਦਿਆਂ ਇਨਕਲਾਬੀ ਜੋਸ਼ ਨਾਲ ਮਨਾਉਣ ਹਿੱਤ ਹੁਣ ਤੋਂ ਹੀ ਤਿਆਰੀਆਂ 'ਚ ਜੁਟ ਜਾਣ ਦਾ ਸੱਦਾ ਦਿੱਤਾ।''
ਸੂਬਾ ਸਕੱਤਰੇਤ ਵਲੋਂ ਲੰਘੀਆਂ ਵਿਧਾਨ ਸਭਾ ਚੋਣਾਂ 'ਚ ਸੀਮਤ ਵਸੀਲਿਆਂ ਦੇ ਬਾਵਜੂਦ ਖੱਬੇ ਮੋਰਚੇ ਦੇ ਉਮੀਦਵਾਰਾਂ ਨੂੰ ਪੰਜਾਬ ਦੀ ਹਕੀਕੀ ਬਿਹਤਰੀ ਚਾਹੁੰਦੇ ਲੋਕਾਂ ਵਲੋਂ ਦਿੱਤੇ ਗਏ ਭਰਪੂਰ ਸਰਵਪੱਖੀ ਸਮਰਥਨ ਲਈ ਉਨ੍ਹਾਂ ਦਾ ਧੰਨਵਾਦ ਕਰਦਿਆਂ ਭਰੋਸਾ ਦਿੱਤਾ ਗਿਆ ਕਿ ਪਾਰਟੀ ਅਤੇ ਖੱਬੀਆਂ ਪਾਰਟੀਆਂ ਵਲੋਂ ਲੋਕ ਆਸਾਂ ਦੀ ਪੂਰਤੀ ਲਈ ਖੱਬੀ ਏਕਤਾ ਅਤੇ ਜਨ ਸੰਗਰਾਮਾਂ ਨੂੰ ਹੋਰ ਮਜ਼ਬੂਤ 'ਤੇ ਤੇਜ਼ ਕਰਨ ਲਈ ਪੂਰਾ ਤਾਣ ਲਾਇਆ ਜਾਵੇਗਾ। ਮੀਟਿੰਗ ਵਿਚ ਫੈਸਲਾ ਕੀਤਾ ਗਿਆ ਕਿ 8 ਮਾਰਚ ਕੌਮਾਂਤਰੀ ਇਸਤਰੀ ਦਿਵਸ ਨੂੰ ''ਨਾਰੀ ਅਧਿਕਾਰ ਦਿਵਸ'' ਵਜੋਂ ਮਨਾਇਆ ਜਾਵੇਗਾ ਅਤੇ ਇਸ ਦਿਨ ਜਨਵਾਦੀ ਇਸਤਰੀ ਸਭਾ ਤੇ ਹੋਰ ਨਾਰੀ ਸੰਗਠਨਾਂ ਵਲੋਂ ਕੀਤੇ ਜਾਣ ਵਾਲੇ ਲੋਕ ਹਿਤੂ ਸਮਾਗਮਾਂ ਨੂੰ ਪੂਰੀ ਪੂਰੀ ਹਿਮਾਇਤ ਦਿੱਤੀ ਜਾਵੇਗੀ। ਮੀਟਿੰਗ ਵਲੋਂ ''21 ਫਰਵਰੀ ਸੰਸਾਰ ਮਾਤਾ ਭਾਸ਼ਾ ਦਿਵਸ'' ਸਮੇਂ ਕੇਂਦਰੀ ਪੰਜਾਬ ਲੇਖਕ ਸਭਾ ਅਤੇ ਹੋਰ ਪੰਜਾਬੀ ਭਾਸ਼ਾ ਪ੍ਰੇਮੀਆਂ ਵਲੋਂ ਚੰਡੀਗੜ੍ਹ ਵਿਖੇ ਕੀਤੇ ਜਾ ਰਹੇ ਐਕਸ਼ਨ ਨੂੰ ਵੀ ਹਰ ਪੱਖੋਂ ਸਹਿਯੋਗ ਦੇਣ ਦਾ ਫੈਸਲਾ ਕੀਤਾ ਗਿਆ। ਮੀਟਿੰਗ ਵਿਚ ਸੂਝ ਤੋਂ ਕੋਰੇ ਨੋਟਬੰਦੀ ਦੇ ਫੈਸਲੇ ਅਤੇ ਸਾਮਰਾਜ ਪੱਖੀ ਨੀਤੀਆਂ ਕਰਕੇ ਮੁੱਖ ਫਸਲਾਂ ਖਾਸ ਕਰ ਆਲੂ, ਟਮਾਟਰ, ਪਿਆਜ਼ ਆਦਿ ਦੀ ਹੋ ਰਹੀ ਬੇਕਦਰੀ ਨਾਲ ਕਿਸਾਨਾਂ ਦੇ ਹੋਏ ਅਰਬਾਂ ਖਰਬਾਂ ਦੇ ਨੁਕਸਾਨ ਵਿਰੁੱਧ ਐਕਸ਼ਨ ਲਾਮਬੰਦ ਕਰਨ ਦਾ ਵੀ ਫੈਸਲਾ ਕੀਤਾ ਗਿਆ।
ਵਿਧਾਨ ਸਭਾ ਚੋਣ ਮੁਹਿੰਮ ਦਰਮਿਆਨ ਮੌੜ ਮੰਡੀ (ਬਠਿੰਡਾ) ਵਿਖੇ ਬੰਬ ਧਮਾਕੇ ਨਾਲ ਮਾਰੇ ਗਏ ਅੱਧੀ ਦਰਜਨ ਤੋਂ ਵਧੇਰੇ ਲੋਕਾਂ ਪ੍ਰਤੀ ਸੰਵੇਦਨਾ ਪ੍ਰਗਟ ਕਰਦਿਆਂ ਮੀਟਿੰਗ ਵਲੋਂ ਕਿਹਾ ਗਿਆ ਕਿ ਪੰਜਾਬ 'ਚ ਅੱਤਵਾਦ ਦੇ ਕਾਲੇ ਦਿਨ ਫਿਰ ਤੋਂ ਪਰਤਾਉਣ ਦੀ ਮਾਨਵਦੋਖੀ ਮੰਸ਼ਾ ਅਧੀਨ ਕੀਤੇ ਗਏ ਉਕਤ ਬੰਬ ਧਮਾਕੇ ਪਿੱਛੇ ਲੁਕੀ ਸਾਜਿਸ਼ ਨੂੰ ਪੰਜਾਬ ਦੇ ਲੋਕ ਹਰ ਹਾਲਤ ਫੇਲ੍ਹ ਕਰਨਗੇ।
ਮੀਟਿੰਗ ਦੇ ਸ਼ੁਰੂ ਵਿਚ ਪਾਰਟੀ ਦੇ ਸੂਬਾ ਸਕੱਤਰੇਤ ਮੈਂਬਰ ਅਤੇ ਉਘੇ ਕਿਸਾਨ ਘੁਲਾਟੀਏ ਸਾਥੀ ਗੁਰਨਾਮ ਸਿੰਘ ਸੰਘੇੜਾ ਨੂੰ ਦੋ ਮਿੰਟ ਮੌਨ ਖੜੋ ਕੇ ਸ਼ਰਧਾਂਜਲੀਆਂ ਭੇਂਟ ਕੀਤੀਆਂ ਗਈਆਂ।
(ਮੰਗਤ ਰਾਮ ਪਾਸਲਾ)

ਸਾਥੀ ਗੁਰਨਾਮ ਸਿੰਘ ਸੰਘੇੜਾ ਦਾ ਦੇਹਾਂਤ, ਅੰਤਿਮ ਸਸਕਾਰ 26 ਜਨਵਰੀ ਨੂੰ

Com Gurnam Singh Sanghera, District Secretary RMPI, Jalandhar

ਜਲੰਧਰ,  24 ਜਨਵਰੀ - ਉਘੇ ਕਮਿਊਨਿਸਟ ਆਗੂ ਸਾਥੀ ਗੁਰਨਾਮ ਸਿੰਘ ਸੰਘੇੜਾ ਨਹੀਂ ਰਹੇ। ਉਹ ਪਿਛਲੇ 6 ਮਹੀਨਿਆਂ ਤੋਂ ਕੈਂਸਰ ਦੀ ਨਾਮੁਰਾਦ ਬਿਮਾਰੀ ਨਾਲ ਜੂਝ ਰਹੇ ਸਨ ਤੇ ਅੱਜ ਮੰਗਲਵਾਰ ਤੜਕੇ ਉਨ੍ਹਾਂ ਦਾ ਦੇਹਾਂਤ ਹੋ ਗਿਆ।
ਸਾਥੀ ਗੁਰਨਾਮ ਸਿੰਘ ਸੰਘੇੜਾ ਭਾਰਤੀ ਇਨਕਲਾਬੀ ਮਾਰਕਸਿਸਟ ਪਾਰਟੀ (ਆਰ.ਐਮ.ਪੀ.ਆਈ.) ਦੇ ਸੂਬਾ ਸਕੱਤਰੇਤ ਮੈਂਬਰ, ਪਾਰਟੀ ਦੀ ਜ਼ਿਲ੍ਹਾ ਜਲੰਧਰ ਕਮੇਟੀ ਦੇ ਸਕੱਤਰ, ਜਮਹੂਰੀ ਕਿਸਾਨ ਸਭਾ ਦੇ ਸੂਬਾਈ ਮੀਤ ਪ੍ਰਧਾਨ ਅਤੇ ਮੰਡ-ਬੇਟ ਏਰੀਆ ਆਬਾਦਕਾਰ ਸੰਘਰਸ਼ ਕਮੇਟੀ ਦੇ ਸੂਬਾ ਪ੍ਰਧਾਨ ਸਨ।
ਆਰ.ਐਮ.ਪੀ.ਆਈ. ਦੇ ਜਨਰਲ ਸਕੱਤਰ ਸਾਥੀ ਮੰਗਤ ਰਾਮ ਪਾਸਲਾ, ਜਮਹੂਰੀ ਕਿਸਾਨ ਸਭਾ ਪੰਜਾਬ ਦੇ ਸੂਬਾ ਪ੍ਰਧਾਨ ਡਾ. ਸਤਨਾਮ ਸਿੰਘ ਅਜਨਾਲਾ, ਜਨਰਲ ਸਕੱਤਰ ਸਾਥੀ ਕੁਲਵੰਤ ਸਿੰਘ ਸੰਧੂ, ਦਿਹਾਤੀ ਮਜ਼ਦੂਰ ਸਭਾ ਦੇ ਸੂਬਾ ਪ੍ਰਧਾਨ ਦਰਸ਼ਨ ਨਾਹਰ, ਜਨਰਲ ਸਕੱਤਰ ਗੁਰਨਾਮ ਸਿੰਘ ਦਾਊਦ, ਪੰਜਾਬ ਨਿਰਮਾਣ ਮਜ਼ਦੂਰ ਸਭਾ ਦੇ ਪ੍ਰਧਾਨ ਗੰਗਾ ਪ੍ਰਸ਼ਾਦ ਤੇ ਜਨਰਲ ਸਕੱਤਰ ਹਰਿੰਦਰ ਸਿੰਘ ਰੰਧਾਵਾ, ਜਨਵਾਦੀ ਇਸਤਰੀ ਸਭਾ ਪੰਜਾਬ ਦੀ ਪ੍ਰਧਾਨ ਦਰਸ਼ਨ ਕੌਰ ਤੇ ਜਨਰਲ ਸਕੱਤਰ ਨੀਲਮ ਘੁਮਾਣ, ਸ਼ਹੀਦ ਭਗਤ ਸਿੰਘ ਸਿੰਘ ਨੌਜਵਾਨ ਸਭਾ ਪੰਜਾਬ ਤੇ ਹਰਿਆਣਾ ਦੇ ਸੂਬਾ ਪ੍ਰਧਾਨ ਜਸਵਿੰਦਰ ਸਿੰਘ ਢੇਸੀ ਤੇ ਜਨਰਲ ਸਕੱਤਰ ਮਨਦੀਪ ਸਿੰਘ ਰੱਤੀਆ, ਮੰਡ-ਬੇਟ ਏਰੀਆ ਆਬਾਦਕਾਰ ਸੰਘਰਸ਼ ਕਮੇਟੀ ਦੇ ਜਨਰਲ ਸਕੱਤਰ ਸਾਥੀ ਪਰਗਟ ਸਿੰਘ ਜਾਮਾਰਾਏ ਨੇ ਸਾਥੀ ਸੰਘੇੜਾ ਨੂੰ ਇਕ ਮਿਸਾਲੀ ਕਮਿਊਨਿਸਟ ਕਰਾਰ ਦਿੰਦਿਆਂ ਉਨ੍ਹਾਂ ਦੇ ਸਦੀਵੀਂ ਵਿਛੋੜੇ ਨੂੰ ਸਮੁੱਚੀ ਕਮਿਊਨਿਸਟ ਲਹਿਰ ਲਈ ਇਕ ਵੱਡਾ ਘਾਟਾ ਕਰਾਰ ਦਿੱਤਾ ਹੈ ਅਤੇ ਉਪਰੋਕਤ ਆਗੂਆਂ ਨੇ ਪਰਵਾਰ ਨਾਲ ਦਿੱਲੀ ਹਮਦਰਦੀ ਦਾ ਪ੍ਰਗਟਾਵਾ ਕਰਦਿਆਂ ਕਿਹਾ ਕਿ ਸਾਥੀ ਸੰਘੇੜਾ ਦਾ ਸਮੁੱਚਾ ਜੀਵਨ ਦੱਬੇ ਕੁਚਲੇ, ਬੁਨਿਆਦੀ ਅਧਿਕਾਰਾਂ ਤੋਂ ਵਾਂਝੇ ਲੋਕਾਂ ਦੇ ਹੱਕਾਂ-ਹਿੱਤਾਂ ਲਈ ਸੰਘਰਸ਼ ਦੀ ਇਕ ਗਾਥਾ ਹੈ। ਉਹਨਾਂ ਦੇ ਮਜ਼ਦੂਰਾਂ, ਕਿਸਾਨਾਂ, ਵਿਦਿਆਰਥੀਆਂ, ਨੌਜਵਾਨਾਂ ਤੇ ਹੋਰ ਮਿਹਨਤੀ ਲੋਕਾਂ ਲਈ ਕੀਤੇ ਗਏ ਗੌਰਵਮਈ ਸੰਘਰਸ਼ ਨੂੰ ਹਮੇਸ਼ਾ ਯਾਦ ਰੱਖਿਆ ਜਾਵੇਗਾ ਅਤੇ ਆਖਰੀ ਦਮ ਤੱਕ ਉਹਨਾਂ ਦੇ ਵਿਚਾਰਾਂ ’ਤੇ ਚੱਲਣ ਲਈ ਪਹਿਰਾ ਦਿੱਤਾ ਜਾਵੇਗਾ।
ਸਾਥੀ ਕੁਲਵੰਤ ਸਿੰਘ ਸੰਧੂ ਅਨੁਸਾਰ ਸਾਥੀ ਗੁਰਨਾਮ ਸਿੰਘ ਸੰਘੇੜਾ ਦਾ ਅੰਤਮ ਸੰਸਕਾਰ 26 ਜਨਵਰੀ ਨੂੰ 12 ਵਜੇ ਨਕੋਦਰ ਵਿਖੇ ਕੀਤਾ ਜਾਵੇਗਾ।

ਆਰ ਐਮ ਪੀ ਆਈ ਨੂੰ ਘੜਾ ਚੋਣ ਨਿਸ਼ਾਨ ਅਲਾਟ

ਜਲੰਧਰ, 9 ਦਸੰਬਰ, ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ.ਐਮ.ਪੀ.ਆਈ.) ਨੂੰ ਦੇਸ਼ ਦੇ ਚੋਣ ਕਮਿਸ਼ਨ ਵਲੋਂ ਘੜਾ ਚੋਣ ਨਿਸ਼ਾਨ ਅਲਾਟ ਕੀਤਾ ਗਿਆ ਹੈ। ਇਸ ਗੱਲ ਦਾ ਪ੍ਰਗਟਾਵਾ ਪਾਰਟੀ ਨੂੰ ਮਿਲੇ ਇੱਕ ਪੱਤਰ ਰਾਹੀਂ ਹੋਇਆ ਹੈ। ਪਾਰਟੀ ਵਲੋਂ ਜਾਰੀ ਇੱਕ ਬਿਆਨ ’ਚ ਕਿਹਾ ਕਿ ਪਾਰਟੀ ਦੇ ਕਾਰਕੁੰਨ ਸਰਮਾਏਦਾਰ ਹਾਕਮਾਂ ਨੂੰ ਹਰਾਉਣ ਲਈ ਦਿਨ ਰਾਤ ਇੱਕ ਕਰ ਦੇਣ ਅਤੇ ਨਵਾਂ ਚੋਣ ਨਿਸ਼ਾਨ ਘਰ-ਘਰ ਪੁੱਜਦਾ ਕਰਨ ਲਈ ਵੱਡੇ ਉਦਮ ਕਰਨ।

 

ਖੱਬੀਆਂ ਪਾਰਟੀਆਂ ਵੱਲੋਂ ਪੰਜਾਬ ਵਿਧਾਨ ਸਭਾ ਚੋਣਾਂ 'ਚ ਖੱਬਾ-ਜਮਹੂਰੀ ਬਦਲ ਪੇਸ਼ : 52 ਸੀਟਾਂ ਦੀ ਪਹਿਲੀ ਸੂਚੀ ਜਾਰੀ

ਪੰਜਾਬ ਦੀਆਂ ਖੱਬੀਆਂ ਪਾਰਟੀਆਂ ਦਾ ਸਾਂਝਾ ਮੋਰਚਾ

ਖੱਬੀਆਂ ਪਾਰਟੀਆਂ ਵੱਲੋਂ ਪੰਜਾਬ ਵਿਧਾਨ ਸਭਾ ਚੋਣਾਂ 'ਚ ਖੱਬਾ-ਜਮਹੂਰੀ ਬਦਲ ਪੇਸ਼
52 ਸੀਟਾਂ ਦੀ ਪਹਿਲੀ ਸੂਚੀ ਜਾਰੀ 

ਜਲੰਧਰ, 4 ਜਨਵਰੀ  - ਪੰਜਾਬ ਦੀਆਂ ਖੱਬੀਆਂ ਪਾਰਟੀਆਂ ਵਲੋਂ ਵਿਧਾਨ ਸਭਾ ਦੀਆਂ ਚੋਣਾਂ ਲਈ ਖੱਬੇ-ਜਮਹੂਰੀ ਬਦਲ ਦਾ ਐਲਾਨ ਅੱਜ ਏਥੇ ਸੀ.ਪੀ.ਆਈ. ਦੇ ਸੂਬਾਈ ਸਕੱਤਰ ਕਾਮਰੇਡ ਹਰਦੇਵ ਸਿੰਘ ਅਰਸ਼ੀ, ਸੀ.ਪੀ.ਆਈ.(ਐਮ) ਦੇ ਸੂਬਾਈ ਸਕੱਤਰ ਕਾਮਰੇਡ ਚਰਨ ਸਿੰਘ ਵਿਰਦੀ ਅਤੇ ਆਰ.ਐਮ.ਪੀ.ਆਈ. ਦੇ ਜਨਰਲ ਸਕੱਤਰ ਕਾਮਰੇਡ ਮੰਗਤ ਰਾਮ ਪਾਸਲਾ ਵੱਲੋਂ ਇਕ ਸਾਂਝੀ ਪ੍ਰੈਸ ਕਾਨਫਰੰਸ ਵਿਚ ਕੀਤਾ ਗਿਆ।
ਇਸ ਦਿਸ਼ਾ ਵਿਚ 52 ਸੀਟਾਂ ਦੀ ਪਹਿਲੀ ਸੂਚੀ ਜਾਰੀ ਕੀਤੀ ਗਈ, ਜਿਸ ਅਨੁਸਾਰ 25 ਸੀਟਾਂ 'ਤੇ ਸੀ.ਪੀ.ਆਈ. ਵਲੋਂ, 14 ਸੀਟਾਂ 'ਤੇ ਸੀ.ਪੀ.ਆਈ.(ਐਮ) ਵਲੋਂ ਅਤੇ 13 ਸੀਟਾਂ 'ਤੇ ਆਰ.ਐਮ.ਪੀ.ਆਈ. ਵਲੋਂ ਉਮੀਦਵਾਰ ਚੋਣ ਮੈਦਾਨ 'ਚ ਉਤਾਰੇ ਜਾਣਗੇ। ਇਸ ਤੋਂ ਬਿਨਾਂ ਇਸ ਮੋਰਚੇ ਵੱਲੋਂ ਲੋਕ ਸਭਾ ਹਲਕਾ ਅੰਮ੍ਰਿਤਸਰ ਦੀ ਉੱਪ-ਚੋਣ ਵੀ ਲੜੀ ਜਾਵੇਗੀ।
ਕਮਿਊਨਿਸਟ ਆਗੂਆਂ ਨੇ ਐਲਾਨ ਕੀਤਾ ਕਿ ਇਸ ਵਾਰ ਪੰਜਾਬ ਅੰਦਰ, ਰਾਜ ਸੱਤਾ 'ਤੇ ਵਾਰੋ ਵਾਰੀ ਕਾਬਜ਼ ਹੁੰਦੀਆਂ ਰਹੀਆਂ ਸਰਮਾਏਦਾਰ-ਜਾਗੀਰਦਾਰ ਜਮਾਤਾਂ ਦੀਆਂ ਪਾਰਟੀਆਂ ਦੀ ਅਜਾਰੇਦਾਰੀ ਖਤਮ ਕਰਨ ਲਈ ਜ਼ੋਰਦਾਰ ਹੰਭਲਾ ਮਾਰਿਆ ਜਾਵੇਗਾ ਅਤੇ ਇਕ ਲੋਕ ਪੱਖੀ ਖੱਬਾ-ਜਮਹੂਰੀ ਰਾਜਸੀ ਬਦਲ ਉਭਾਰਕੇ ਪੰਜਾਬ ਵਾਸੀਆਂ ਦੇ ਸਰਵਪੱਖੀ ਵਿਕਾਸ ਦਾ ਰਾਹ ਰੁਸ਼ਨਾਇਆ ਜਾਵੇਗਾ।
ਉਨ੍ਹਾਂ ਕਿਹਾ ਕਿ ਅਕਾਲੀ-ਭਾਜਪਾ ਗਠਜੋੜ ਸਰਕਾਰ ਦੇ ਕਾਰਜ ਕਾਲ ਦੌਰਾਨ ਮਾਫੀਆ-ਤੰਤਰ ਦੀ ਵਧੀ ਲੁੱਟ-ਖਸੁੱਟ ਨੇ ਅਤੇ ਗੁੰਡਾ-ਗਰੋਹਾਂ ਨੇ ਲੋਕਾਂ ਉੱਪਰ ਮੁਸੀਬਤਾਂ ਦੇ ਪਹਾੜ ਲੱਦ ਦਿੱਤੇ ਹਨ। ਜਦੋਂਕਿ ਸਾਮਰਾਜ ਨਿਰਦੇਸ਼ਤ ਨਵਉਦਾਰਵਾਦੀ ਨੀਤੀਆਂ ਕਾਰਨ ਪ੍ਰਾਂਤ ਅੰਦਰ ਬੇਰੁਜ਼ਗਾਰਾਂ ਦੀਆਂ ਕਤਾਰਾਂ ਨਿਰੰਤਰ ਲੰਬੀਆਂ ਹੁੰਦੀਆਂ ਗਈਆਂ ਹਨ, ਮਹਿੰਗਾਈ ਵਧਦੀ ਗਈ ਹੈ, ਸਿੱਖਿਆ ਤੇ ਸਿਹਤ ਸਹੂਲਤਾਂ ਆਮ ਲੋਕਾਂ ਦੀ ਪਹੁੰਚ ਤੋਂ ਬਾਹਰ ਚਲੀਆਂ ਗਈਆਂ ਹਨ, ਨਸ਼ਾਖੋਰੀ ਵਿਚ ਤਿੱਖਾ ਵਾਧਾ ਹੋਇਆ ਹੈ, ਭਰਿਸ਼ਟਾਚਾਰ ਨੇ ਏਥੇ ਸੰਸਥਾਗਤ ਰੂਪ ਧਾਰਨ ਕਰ ਲਿਆ ਹੈ, ਖੇਤ ਮਜ਼ਦੂਰਾਂ ਤੇ ਕਿਸਾਨਾਂ ਦੀ ਮੰਦਹਾਲੀ ਉਹਨਾਂ ਨੂੰ ਨਿਰਾਸ਼ਾਵਸ ਖੁਦਕੁਸ਼ੀਆਂ ਕਰਨ ਤੱਕ ਲੈ ਗਈ ਹੈ, ਅਮਨ ਕਾਨੂੰਨ ਦੀ ਹਾਲਤ ਦਿਨੋਂ ਦਿਨ ਬਿਗੜਦੀ ਗਈ ਹੈ ਅਤੇ ਲੁੱਟਾਂ ਖੋਹਾਂ ਤੇ ਔਰਤਾਂ ਉਪਰ ਵਧੇ ਜਿਣਸੀ ਹਮਲਿਆਂ ਦੀਆਂ ਚਿੰਤਾਜਨਕ ਘਟਨਾਵਾਂ ਵਿਚ ਤਿੱਖਾ ਵਾਧਾ ਹੋਇਆ ਹੈ।
ਉਹਨਾਂ ਕਿਹਾ ਕਿ ਭਾਵੇਂ ਇਸ ਵਾਰ ਵੀ ਕਾਰਪੋਰੇਟ ਪੱਖੀ ਪਾਰਟੀਆਂ, ਵਿਸ਼ੇਸ਼ ਤੌਰ ਤੇ ਅਕਾਲੀ-ਭਾਜਪਾ ਫਿਰਕੂ ਗਠਜੋੜ, ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ, ਵਲੋਂ ਬੇਹਿਸਾਬੇ ਮਾਇਕ ਵਸੀਲੇ ਜੁਟਾਕੇ ਅਤੇ ਲੋਕਾਂ ਨੂੰ ਭਰਮਾਉਣ ਲਈ ਹਰ ਤਰ੍ਹਾਂ ਦੇ ਅਨੈਤਿਕ ਢੰਗ ਤਰੀਕੇ ਵਰਤਕੇ ਆਪੋ ਆਪਣੀ ਜਿੱਤ ਦੇ ਦਾਅਵੇ ਕੀਤੇ ਜਾ ਰਹੇ ਹਨ। ਪ੍ਰੰਤੂ ਇਹਨਾਂ ਦੇ ਇਹ ਸਾਰੇ ਦਾਅਵੇ ਪੂਰੀ ਤਰ੍ਹਾਂ ਖੋਖਲੇ ਤੇ ਬੇਬੁਨਿਆਦ ਹਨ। ਕਿਉਂਕਿ ਇਹਨਾਂ ਪਾਰਟੀਆਂ ਦੇ ਆਗੂਆਂ ਵਲੋਂ ਇਕ ਦੂਜੀ ਪਾਰਟੀ ਦੇ ਆਗੂਆਂ ਉਪਰ ਕੀਤੀ ਜਾਂਦੀ ਸੱਚੀ-ਝੂਠੀ ਤੁਹਮਤਬਾਜ਼ੀ ਅਖਬਾਰਾਂ ਦੀਆਂ ਸੁਰਖੀਆਂ ਤਾਂ ਬਟੋਰ ਸਕਦੀ ਹੈ ਪਰ ਇਹਨਾਂ ਗੱਲਾਂ ਦਾ ਆਮ ਲੋਕਾਂ ਦੀਆਂ ਉਪਰੋਕਤ ਬੁਨਿਆਦੀ ਸਮੱਸਿਆਵਾਂ ਨਾਲ ਕੋਈ ਸਬੰਧ ਨਹੀਂ ਹੈ। ਲੋਕਾਂ ਦੀਆਂ ਸਾਰੀਆਂ ਸਮੱਸਿਆਵਾਂ ਲਈ ਜਿੰਮੇਵਾਰ ਸਾਮਰਾਜ ਨਿਰਦੇਸ਼ਤ ਨੀਤੀਆਂ ਦੀਆਂ ਤਾਂ ਇਹ ਸਾਰੀਆਂ ਪਾਰਟੀਆਂ ਹੀ ਸਮਰੱਥਕ ਹਨ ਅਤੇ ਇਕ ਦੂਜੀ ਨਾਲ ਪੂਰੀ ਤਰ੍ਹਾਂ ਸੁਰਤਾਲ ਮਿਲਾਕੇ ਚਲਦੀਆਂ ਹਨ।
ਕਮਿਊਨਿਸਟ ਆਗੂਆਂ ਨੇ ਕਿਹਾ ਕਿ ਇਸ ਹਾਲਤ ਵਿਚ ਖੱਬਾ ਮੋਰਚਾ ਪੰਜਾਬ ਵਾਸੀਆਂ ਦੇ ਸਨਮੁੱਖ ਇਕ ਬਦਲਵਾਂ ਲੋਕ ਪੱਖੀ ਖੱਬਾ-ਜਮਹੂਰੀ ਨੀਤੀਗਤ ਚੌਖਟਾ ਪੇਸ਼ ਕਰੇਗਾ, ਜਿਸ ਵਾਸਤੇ ਖੱਬੀਆਂ ਪਾਰਟੀਆਂ ਲੰਮੇ ਸਮੇਂ ਤੋਂ ਜੂਝਦੀਆਂ ਆ ਰਹੀਆਂ ਹਨ ਅਤੇ ਪ੍ਰਾਂਤ ਦੇ ਸੰਘਰਸ਼ਸ਼ੀਲ ਲੋਕਾਂ ਨਾਲ ਡੱਟਕੇ ਖੜੀਆਂ ਰਹੀਆਂ ਹਨ।
ਖੱਬੀਆਂ ਪਾਰਟੀਆਂ ਦੇ ਇਹਨਾਂ ਆਗੂਆਂ ਨੇ ਪ੍ਰਾਂਤ ਦੀਆਂ ਹੋਰ ਖੱਬੀਆਂ, ਜਮਹੂਰੀ, ਧਰਮ ਨਿਰਪੱਖ ਤੇ ਦੇਸ਼ ਭਗਤ ਸ਼ਕਤੀਆਂ ਨੂੰ ਵੀઠਇਹਨਾਂ ਚੋਣਾਂ ਵਿਚ ਖੱਬੇ ਮੋਰਚੇ ਵਿਚ ਸ਼ਾਮਲ ਹੋਣ ਅਤੇ ਇਸਦਾ ਡਟਵਾਂ ਸਮਰਥਨ ਕਰਨ ਦੀ ਅਪੀਲ ਕੀਤੀ ਹੈ। ਉਹਨਾਂ ਕਿਹਾ ਕਿ ਖੱਬੇ ਮੋਰਚੇ ਦਾ ਚੋਣ ਮਨੋਰਥ ਪੱਤਰ 9 ਜਨਵਰੀ ਨੂੰ ਰਲੀਜ਼ ਕੀਤਾ ਜਾਵੇਗਾ। ਉਸ ਦਿਨ ਉਮੀਦਵਾਰਾਂ ਦੀ ਮੁਕੰਮਲ ਸੂਚੀ ਵੀ ਜਾਰੀ ਕੀਤੀ ਜਾਵੇਗੀ।


(ਹਰਦੇਵ ਸਿੰਘ ਅਰਸ਼ੀ)       (ਚਰਨ ਸਿੰਘ ਵਿਰਦੀ)      (ਮੰਗਤ ਰਾਮ ਪਾਸਲਾ)
ਸਕੱਤਰ                                        ਸਕੱਤਰ                ਜਨਰਲ ਸਕੱਤਰ
ਸੀ.ਪੀ.ਆਈ.                     ਸੀ.ਪੀ.ਆਈ.(ਐਮ)            ਆਰ.ਐਮ.ਪੀ.ਆਈ.
ਪੰਜਾਬ ਰਾਜ ਕੌਂਸਲ            ਪੰਜਾਬ ਰਾਜ ਕਮੇਟੀ   

 

ਖੱਬੇ ਮੋਰਚੇ ਵਲੋਂ ਲੜੀਆਂ ਜਾ ਰਹੀਆਂ ਸੀਟਾਂ ਦੀ ਸੂਚੀ 
1. ਦੀਨਾ ਨਗਰ     ਸੀ.ਪੀ.ਆਈ.
2. ਅੰਮ੍ਰਿਤਸਰ ਪੱਛਮੀ    ਸੀ.ਪੀ.ਆਈ.
3. ਅੰਮ੍ਰਿਤਸਰ ਪੂਰਬੀ    ਸੀ.ਪੀ.ਆਈ.
4. ਅੰਮ੍ਰਿਤਸਰ ਦੱਖਣੀ     ਸੀ.ਪੀ.ਆਈ.
5. ਅਟਾਰੀ    ਸੀ.ਪੀ.ਆਈ.
6. ਖਡੂਰ ਸਾਹਿਬ    ਸੀ.ਪੀ.ਆਈ.
7. ਦਸੂਹਾ    ਸੀ.ਪੀ.ਆਈ.
8. ਬੰਗਾ    ਸੀ.ਪੀ.ਆਈ.
9. ਨਿਹਾਲ ਸਿੰਘ ਵਾਲਾ    ਸੀ.ਪੀ.ਆਈ.
10. ਧਰਮਕੋਟ    ਸੀ.ਪੀ.ਆਈ.
11. ਫਾਜ਼ਿਲਕਾ    ਸੀ.ਪੀ.ਆਈ.
12. ਮਲੋਟ    ਸੀ.ਪੀ.ਆਈ.
13. ਜੈਤੋਂ     ਸੀ.ਪੀ.ਆਈ.
14. ਬਠਿੰਡਾ ਦਿਹਾਤੀ    ਸੀ.ਪੀ.ਆਈ.
15. ਅਮਰਗੜ੍ਹ    ਸੀ.ਪੀ.ਆਈ.
16. ਧੂਰੀ    ਸੀ.ਪੀ.ਆਈ.
17. ਨਾਭਾ     ਸੀ.ਪੀ.ਆਈ.
18. ਪਟਿਆਲਾ ਦਿਹਾਤੀ    ਸੀ.ਪੀ.ਆਈ.
19. ਸ਼ਤੁਰਾਣਾ    ਸੀ.ਪੀ.ਆਈ.
20. ਰੂਪ ਨਗਰ    ਸੀ.ਪੀ.ਆਈ.
21. ਲਹਿਰਾਗਾਗਾ    ਸੀ.ਪੀ.ਆਈ.
22. ਮਹਿਲਕਲਾਂ    ਸੀ.ਪੀ.ਆਈ.
23. ਮਾਨਸਾ    ਸੀ.ਪੀ.ਆਈ.
24. ਬੁਢਲਾਡਾ    ਸੀ.ਪੀ.ਆਈ.
25. ਜਲਾਲਾਬਾਦ    ਸੀ.ਪੀ.ਆਈ.
 
26. ਬਟਾਲਾ    ਸੀ.ਪੀ.ਆਈ.(ਐਮ)
27. ਆਦਮਪੁਰ    ਸੀ.ਪੀ.ਆਈ.(ਐਮ)
28. ਸ਼ਾਹਕੋਟ    ਸੀ.ਪੀ.ਆਈ.(ਐਮ)
29. ਗੜ੍ਹਸ਼ੰਕਰ    ਸੀ.ਪੀ.ਆਈ.(ਐਮ)
30. ਬਲਾਚੌਰ    ਸੀ.ਪੀ.ਆਈ.(ਐਮ)
31. ਆਨੰਦਪੁਰ ਸਾਹਿਬ    ਸੀ.ਪੀ.ਆਈ.(ਐਮ)
32. ਜਗਰਾਓਂ    ਸੀ.ਪੀ.ਆਈ.(ਐਮ)
33. ਰਾਏਕੋਟ    ਸੀ.ਪੀ.ਆਈ.(ਐਮ)   
34. ਸੁਨਾਮ    ਸੀ.ਪੀ.ਆਈ.(ਐਮ)
35. ਘਨੌਰ    ਸੀ.ਪੀ.ਆਈ.(ਐਮ)
36. ਤਰਨ ਤਾਰਨ    ਸੀ.ਪੀ.ਆਈ.(ਐਮ)
37. ਡੇਰਾਬੱਸੀ    ਸੀ.ਪੀ.ਆਈ.(ਐਮ)
38. ਫਰੀਦਕੋਟ    ਸੀ.ਪੀ.ਆਈ.(ਐਮ)
39. ਨਵਾਂ ਸ਼ਹਿਰ    ਸੀ.ਪੀ.ਆਈ.(ਐਮ)
 
40. ਸੁਜਾਨਪੁਰ    ਆਰ.ਐਮ.ਪੀ.ਆਈ.
41. ਭੋਆ    ਆਰ.ਐਮ.ਪੀ.ਆਈ.
42. ਅਜਨਾਲਾ    ਆਰ.ਐਮ.ਪੀ.ਆਈ.
43. ਰਾਜਾਸਾਂਸੀ    ਆਰ.ਐਮ.ਪੀ.ਆਈ.
44. ਖੇਮਕਰਨ    ਆਰ.ਐਮ.ਪੀ.ਆਈ.
45. ਬਾਬਾ ਬਕਾਲਾ    ਆਰ.ਐਮ.ਪੀ.ਆਈ.
46. ਸੁਲਤਾਨਪੁਰ ਲੋਧੀ    ਆਰ.ਐਮ.ਪੀ.ਆਈ.
47. ਫਿਲੌਰ    ਆਰ.ਐਮ.ਪੀ.ਆਈ.
48. ਨਕੋਦਰ    ਆਰ.ਐਮ.ਪੀ.ਆਈ.
49. ਮੁਕੇਰੀਆਂ    ਆਰ.ਐਮ.ਪੀ.ਆਈ.
50. ਅਬੋਹਰ    ਆਰ.ਐਮ.ਪੀ.ਆਈ.
51. ਮੁਕਤਸਰ ਸਾਹਿਬ    ਆਰ.ਐਮ.ਪੀ.ਆਈ.
52. ਸਰਦੂਲਗੜ੍ਹ         ਆਰ.ਐਮ.ਪੀ.ਆਈ.

ਮੋਦੀ ਸਰਕਾਰ ਵਲੋਂ ਕਣਕ ਦੀ ਦਰਾਮਦ ਖੋਲ੍ਹਕੇ ਕਿਸਾਨੀ ਨੂੰ ਤਬਾਹ ਕਰਨ ਵਿਰੁੱਧ 27-28-29 ਦਸੰਬਰ ਨੂੰ ਅਰਥੀ ਫੂਕ ਮੁਜਾਹਰੇ ਕੀਤੇ ਜਾਣਗੇ : ਪਾਸਲਾ

ਜਲੰਧਰ, 18 ਦਸੰਬਰ, ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ.ਐਮ.ਪੀ.ਆਈ.) ਦੇ ਪੰਜਾਬ ਰਾਜ ਕਮੇਟੀ ਦੇ ਸਕੱਤਰੇਤ ਨੇ ਮੋਦੀ ਸਰਕਾਰ ਵਲੋਂ ਡਬਲਿਯੂ.ਟੀ.ਓ. ਦੇ ਦਬਾਅ ਹੇਠ ਕਣਕ ਦੀ ਦਰਾਮਦ ਉੱਤੇ ਲੱਗੇ ਹੋਏ ਟੈਕਸ ਨੂੰ ਪੂਰੀ ਤਰ੍ਹਾਂ ਖਤਮ ਕਰਕੇ ਦੇਸ਼ ਦੀ ਕਿਸਾਨੀ ਦੀ ਮੁਕੰਮਲ ਤਬਾਹੀ ਦਾ ਰਾਹ ਖੋਲ੍ਹਣ ਵਿਰੱਧ 27-28-29 ਦਸੰਬਰ ਨੂੰ ਸਮੁੱਚੇ ਪ੍ਰਾਂਤ ਅੰਦਰ ਵਿਸ਼ਾਲ ਅਰਥੀ ਫੂਕ ਮੁਜ਼ਾਹਰੇ ਕਰਨ ਦਾ ਫੈਸਲਾ ਕੀਤਾ ਹੈ। ਇਹ ਫੈਸਲਾ ਅੱਜ ਇਥੇ ਸਕੱਤਰੇਤ ਦੀ ਕਾਮਰੇਡ ਇੰਦਰਜੀਤ ਸਿੰਘ ਗਰੇਵਾਲ ਦੀ ਪ੍ਰਧਾਨਗੀ ਹੇਠ ਹੋਈ ਇੱਕ ਮੀਟਿੰਗ ’ਚ ਕੀਤਾ ਗਿਆ। 

ਮੀਟਿੰਗ ਦੇ ਫੈਸਲੇ ਪ੍ਰੈਸ ਨੂੰ ਰਲੀਜ਼ ਕਰਦਿਆਂ ਪਾਰਟੀ ਦੇ ਜਨਰਲ ਸਕੱਤਰ ਕਾਮਰੇਡ ਮੰਗਤ ਰਾਮ ਪਾਸਲਾ ਨੇ ਐਲਾਨ ਕੀਤਾ ਕਿ ਕੇਂਦਰ ਦੀਆਂ ਖੁੱਲ੍ਹੀ ਮੰਡੀ ਦੀਆਂ ਨਵਉਦਾਰਵਾਦੀ ਨੀਤੀਆਂ ਰਾਹੀਂ ਦੇਸ਼ ਦੇ ਕਿਰਤੀ ਲੋਕਾਂ ਦੀ ਰੋਟੀ-ਰੋਜੀ ਉਪਰ ਹਮਲੇ ਕਰਦੇ ਜਾਣ ਵਿਰੁੱਧ ਪਾਰਟੀ ਵਲੋਂ ਹੋਰ ਖੱਬੀਆਂ ਤੇ ਜਮਹੂਰੀ ਸ਼ਕਤੀਆਂ ਨਾਲ ਰਲਕੇ ਸ਼ਕਤੀਸ਼ਾਲੀ ਲੋਕ ਲਾਮਬੰਦੀ ਕੀਤੀ ਜਾਵੇਗੀ। ਸਾਥੀ ਪਾਸਲਾ ਨੇ ਅੱਗੇ ਕਿਹਾ ਕਿ ਉਪਰੋਕਤ ਮੁਜਾਹਰਿਆਂ ਦੌਰਾਨ ਨੋਟਬੰਦੀ ਕਾਰਨ ਲੋਕਾਂ ਦੀਆਂ ਵਧੀਆਂ ਮੁਸ਼ਕਲਾਂ ਅਤੇ ਰੁਜ਼ਗਾਰ ਦੇ ਵਸੀਲਿਆਂ ਨੂੰ ਲੱਗੀ ਵੱਡੀ ਢਾਅ ਵਿਰੁੱਧ ਵੀ ਜੋਰਦਾਰ ਅਵਾਜ਼ ਬੁਲੰਦ ਕੀਤੀ ਜਾਵੇਗੀ।

ਪ੍ਰਾਂਤ ਦੀ ਗੰਭੀਰ ਰਾਜਨੀਤਕ ਸਥਿਤੀ ’ਤੇ ਵਿਚਾਰ ਵਟਾਂਦਰਾ ਕਰਦਿਆਂ ਸਕੱਤਰੇਤ ਨੇ ਲੋਕਾਂ ਨੂੰ ਸੱਦਾ ਦਿੱਤਾ ਕਿ ਆਉਂਦੀਆਂ ਚੋਣਾਂ ’ਚ ਮਹਿੰਗਾਈ, ਬੇਰੁਜ਼ਗਾਰੀ, ਭਰਿਸ਼ਟਾਚਾਰ, ਨਸ਼ਾਖੋਰੀ ਤੇ ਪ੍ਰਸ਼ਾਸਨਿਕ ਜਬਰ ਲਈ ਜਿੰਮੇਵਾਰ ਸਿਆਸੀ ਧਿਰਾਂ ਅਕਾਲੀ-ਭਾਜਪਾ ਗੱਠਜੋੜ, ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਨੂੰ ਹਰਾਕੇ ਖੱਬੀਆਂ ਸ਼ਕਤੀਆਂ ਨੂੰ ਮਜਬੂਤ ਕੀਤਾ ਜਾਵੇ। ਪਾਰਟੀ ਸਕੱਤਰੇਤ ਨੇ ਇਸ ਦਿਸ਼ਾ ’ਚ ਚਾਰ ਖੱਬੀਆਂ ਪਾਰਟੀਆਂ ਵਿਚਕਾਰ ਤਾਲਮੇਲ ਵੱਧਾਉਣ ਤੇ ਖੱਬਾ ਮੋਰਚਾ ਬਣਾਕੇ ਆਉਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ’ਚ ਹਿੱਸਾ ਲੈਣ ਦੇ ਫੈਸਲੇ ਉੱਪਰ ਡੂੰਘੀ ਤਸੱਲੀ ਦਾ ਪ੍ਰਗਟਾਵਾ ਕੀਤਾ ਅਤੇ ਖੱਬੇ ਮੋਰਚੇ ਦੇ ਉਮੀਦਵਾਰਾਂ ਦੀ ਜਿੱਤ ਨੂੰ ਯਕੀਨੀ ਬਣਾਉਣ ਲਈ ਆਪਣੀਆਂ ਸਫਾਂ ਨੂੰ ਤੁਰੰਤ ਜੁਟ ਜਾਣ ਦਾ ਸੱਦਾ ਦਿੱਤਾ। 

ਮੀਟਿੰਗ ਦੇ ਆਰੰਭ ’ਚ ਉੱਘੇ ਕੌਮਾਂਤਰੀ ਕਰਾਂਤੀਕਾਰੀ ਆਗੂ ਸਾਥੀ ਫੀਦਲ ਕਾਸਤਰੋ ਨੂੰ ਇਨਕਲਾਬੀ ਸ਼ਰਧਾਂਜ਼ਲੀ ਭੇਂਟ ਕੀਤੀ ਗਈ।
                                                                                                 ਜਾਰੀ ਕਰਤਾ

                                                                                       (ਮੰਗਤ ਰਾਮ ਪਾਸਲਾ)
                                                                                         98141-82998
 

ਖੱਬੇ ਮੋਰਚੇ ਵਲੋਂ ਪੰਜਾਬ ਅਸੰਬਲੀ ਚੋਣਾਂ ਵਿਚ 62 ਸੀਟਾਂ ਲੜਨ ਦਾ ਐਲਾਨ

ਪੰਜਾਬ ਦੀਆਂ 4 ਖੱਬੀਆਂ ਪਾਰਟੀਆਂ ਦਾ ਸਾਂਝਾ ਮੋਰਚਾ (ਸੀ.ਪੀ.ਆਈ.; ਸੀ.ਪੀ.ਆਈ.(ਐਮ); ਆਰ.ਐਮ.ਪੀ.ਆਈ.; ਸੀ.ਪੀ.ਆਈ. (ਐਮ.ਐਲ.) ਲਿਬਰੇਸ਼ਨ)
ਜਲੰਧਰ, 16 ਦਸੰਬਰ - ਆਉਂਦੀਆਂ ਅਸੰਬਲੀ ਚੋਣਾਂ ਵਿਚ ਪੰਜਾਬ ਅੰਦਰ ਚਾਰ ਖੱਬੀਆਂ ਪਾਰਟੀਆਂ-ਸੀ.ਪੀ.ਆਈ., ਸੀ.ਪੀ.ਆਈ.(ਐਮ), ਆਰ.ਐਮ.ਪੀ.ਆਈ. ਅਤੇ ਸੀ.ਪੀ.ਆਈ. (ਐਮ.ਐਲ.) ਲਿਬਰੇਸ਼ਨ ’ਤੇ ਅਧਾਰਤ ਖੱਬਾ ਮੋਰਚਾ ਘੱਟੋ-ਘੱਟ 62 ਸੀਟਾਂ ਉਪਰ ਆਪਣੇ ਉਮੀਦਵਾਰ ਚੋਣ ਮੈਦਾਨ ਵਿਚ ਉਤਾਰੇਗਾ। ਇਹ ਫੈਸਲਾ ਅੱਜ ਇੱਥੇ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ.ਐਮ.ਪੀ.ਆਈ.) ਦੇ ਜਨਰਲ ਸਕੱਤਰ ਕਾਮਰੇਡ ਮੰਗਤ ਰਾਮ ਪਾਸਲਾ ਦੀ ਪ੍ਰਧਾਨਗੀ ਹੇਠ ਹੋਈ ਮੀਟਿੰਗ ਵਿਚ ਕੀਤਾ ਗਿਆ।
ਇਸ ਮੀਟਿੰਗ ਵਿਚ ਸੀ.ਪੀ.ਆਈ. ਵਲੋਂ ਪਾਰਟੀ ਦੇ ਸੂਬਾ ਸਕੱਤਰ ਹਰਦੇਵ ਸਿੰਘ ਅਰਸ਼ੀ, ਜਗਰੂਪ ਸਿੰਘ ਅਤੇ ਬੰਤ ਸਿੰਘ ਬਰਾੜ , ਸੀ.ਪੀ.ਆਈ.(ਐਮ) ਵਲੋਂ ਪਾਰਟੀ ਦੇ ਸੂਬਾ ਸਕੱਤਰ ਚਰਨ ਸਿੰਘ ਵਿਰਦੀ, ਕੇਂਦਰੀ ਕਮੇਟੀ ਮੈਂਬਰ ਵਿਜੈ ਮਿਸ਼ਰਾ ਅਤੇ ਰਣਬੀਰ ਵਿਰਕ, ਸੀ.ਪੀ.ਆਈ.(ਐਮ.ਐਲ.) ਲਿਬਰੇਸ਼ਨ ਵਲੋਂ ਪਾਰਟੀ ਦੇ ਸੂਬਾ ਸਕੱਤਰ ਗੁਰਮੀਤ ਸਿੰਘ ਬਖਤਪੁਰ, ਕੇਂਦਰੀ ਕਮੇਟੀ ਮੈਂਬਰ ਰਾਜਵਿੰਦਰ ਸਿੰਘ ਰਾਣਾ, ਸੁਖਦਰਸ਼ਨ ਨੱਤ, ਭਗਵੰਤ ਸਮਾਓਂ, ਰੁਲਦੂ ਸਿੰਘ ਮਾਨਸਾ, ਗੁਰਪ੍ਰੀਤ ਰੁੜੇਕੇ, ਬਲਕਰਨ ਸਿੰਘ ਬੱਲੀ ਅਤੇ ਆਰ.ਐਮ.ਪੀ.ਆਈ. ਵਲੋਂ ਸਾਥੀ ਮੰਗਤ ਰਾਮ ਪਾਸਲਾ ਤੋਂ ਇਲਾਵਾ ਹਰਕੰਵਲ ਸਿੰਘ, ਰਘਬੀਰ ਸਿੰਘ, ਕੁਲਵੰਤ ਸਿੰਘ ਸੰਧੂ ਅਤੇ ਗੁਰਨਾਮ ਸਿੰਘ ਦਾਊਦ ਨੇ ਸ਼ਮੂਲੀਅਤ ਕੀਤੀ। ਮੀਟਿੰਗ ਨੇ ਚੌਹਾਂ ਪਾਰਟੀਆਂ ਵਲੋਂ ਮਿਲਕੇ ਲੜੀਆਂ ਜਾਣ ਵਾਲੀਆਂ 62 ਸੀਟਾਂ ਦੀ ਨਿਸ਼ਾਨਦੇਹੀ ਕਰਨ ਉਪਰੰਤ 46 ਸੀਟਾਂ ਲਈ ਉਮੀਦਵਾਰਾਂ ਬਾਰੇ ਵੀ ਫੈਸਲਾ ਕਰ ਲਿਆ ਹੈ। ਰਹਿੰਦੇ ਉਮੀਦਵਾਰਾਂ ਦੀ ਚੋਣ ਬਾਰੇ ਵੀ ਇਕ ਦੋ ਦਿਨਾਂ ਵਿਚ ਫੈਸਲਾ ਹੋ ਜਾਵੇਗਾ।
ਮੀਟਿੰਗ ਨੇ ਇਹ ਵੀ ਫੈਸਲਾ ਕੀਤਾ ਹੈ ਕਿ ਇਹਨਾਂ ਚੋਣਾਂ ਵਿਚ ਅਕਾਲੀ-ਭਾਜਪਾ ਗਠਜੋੜ, ਕਾਂਗਰਸ ਤੇ ਆਮ ਆਦਮੀ ਪਾਰਟੀ ਵਰਗੀਆਂ ਸਰਮਾਏਦਾਰ ਪੱਖੀ ਪਾਰਟੀਆਂ ਨੂੰ ਭਾਂਜ ਦੇਣ ਲਈ ਲੋਕਾਂ ਨੂੰ ਦਰਪੇਸ਼ ਮਹਿੰਗਾਈ, ਬੇਰੁਜ਼ਗਾਰੀ, ਭਰਿਸ਼ਟਾਚਾਰ, ਨਸ਼ਾ ਖੋਰੀ ਤੇ ਮਾਫੀਆ ਲੁੱਟ ਵਰਗੀਆਂ ਸਮੱਸਿਆਵਾਂ, ਜਿਹਨਾਂ ਵਿਰੁੱਧ ਚਾਰੇ ਪਾਰਟੀਆਂ ਲੰਬੇ ਸਮੇਂ ਤੋਂ ਮਿਲਕੇ ਸੰਘਰਸ਼ ਕਰਦੀਆਂ ਆ ਰਹੀਆਂ ਹਨ, ਦੇ ਹੱਲ ਨੂੰ ਦਰਸਾਉਂਦਾ ਇਕ ਚੋਣ ਮਨੋਰਥ ਪੱਤਰ ਪ੍ਰਾਂਤ ਵਾਸੀਆਂ ਦੇ ਸਨਮੁਖ ਪੇਸ਼ ਕੀਤਾ ਜਾਵੇਗਾ। ਲੋਕ ਪੱਖੀ ਬਦਲਵੀਆਂ ਨੀਤੀਆਂ ਨੂੰ ਦਰਸਾਉਂਦੇ ਇਸ ਚੋਣ ਮਨੋਰਥ ਪੱਤਰ   ਦੀ ਤਿਆਰੀ ਲਈ ਸਰਵਸਾਥੀ ਭੁਪਿੰਦਰ ਸਾਂਭਰ, ਚਰਨ ਸਿੰਘ ਵਿਰਦੀ, ਸੁਖਦਰਸ਼ਨ ਨੱਤ ਅਤੇ ਹਰਕੰਵਲ ਸਿੰਘ ’ਤੇ ਅਧਾਰਤ ਇਕ ਸਬ ਕਮੇਟੀ ਦਾ ਗਠਨ ਕੀਤਾ ਗਿਆ।
ਮੀਟਿੰਗ ਵਿਚ ਪਾਸ ਕੀਤੇ ਗਏ ਇਕ ਮਤੇ ਰਾਹੀਂ ਨੋਟ ਬੰਦੀ ਕਾਰਨ ਲੋਕਾਂ ਦੀਆਂ ਮੁਸ਼ਕਲਾਂ ਦੇ ਨਿਰੰਤਰ ਵੱਧਦੇ ਜਾਣ ਲਈ ਮੋਦੀ ਸਰਕਾਰ ਦੀ ਨਿਖੇਧੀ ਕੀਤੀ ਗਈ ਅਤੇ ਚੌਹਾਂ ਪਾਰਟੀਆਂ ਦੀਆਂ ਸਫ਼ਾਂ ਨੂੰ ਸੱਦਾ ਦਿੱਤਾ ਗਿਆ ਕਿ ਗਰੀਬ ਕਿਰਤੀ ਲੋਕਾਂ ਦੀ ਆਰਥਕਤਾ ਉਪਰ ਸਰਕਾਰ ਵਲੋਂ ਕੀਤੇ ਗਏ ਇਸ ਹਮਲੇ ਦਾ ਹਰ ਪੱਧਰ ’ਤੇ ਡਟਵਾਂ ਵਿਰੋਧ ਕੀਤਾ ਜਾਵੇ।
ਮੀਟਿੰਗ ਦੇ ਆਰੰਭ ਵਿਚ ਮਹਾਨ ਕਰਾਂਤੀਕਾਰੀ ਕਾਮਰੇਡ ਫੀਦਲ ਕਾਸਟਰੋ ਨੂੰ ਦੋ ਮਿੰਟ ਦਾ ਮੌਨ ਧਾਰਨ ਕਰਕੇ ਇਨਕਲਾਬੀ ਸ਼ਰਧਾਂਜਲੀ ਭੇਂਟ ਕੀਤੀ ਗਈ।

(ਮੰਗਤ ਰਾਮ ਪਾਸਲਾ)
98141-82998